兩個美國？

美國的老友回港出差。自從十幾年前響美帝留學兼工作之後，佢已經響美帝落地生根，基本上已經唔係香港人，睇佢衣著已經好清楚，casual到響IFC行街仲以為佢來自東南亞之窮親戚。

我問佢來香港做咩，佢居然答話係來香港停一停，探下屋企人，查實係去北方兼東南亞國家睇廠落單，兼靜靜雞去東南亞睇下，有無機會買嘢。我問佢，買嘢，iPhone？佢話，買公司，M and A呀！

我都覺得奇，乜美國經濟唔係一潭死水咩？佢就話，唔覺美國經濟有極大問題，以佢工作之LA為例，最近一年啲start up好鬼多，多咗百幾間，好多係啲你想都無想過之行業。例如有一次佢出席咖啡界之聚會，認識咗一間搞農業之start up，原來係整緊一個新的技術，如何更有效咁使用「水」，來做好農業生產。佢又話，呢類奇型怪狀之start up，其實係美帝經濟動力之一部分。

其實我老友響美國已經上位到中上層，又有獵頭公司搵佢過檔，似乎撈得好好。佢語重心長話，美國經濟唔係咁差，好快上返來。

當然，呢位老友住響西岸，又係精英，又係民主黨支持者，梗係話奧巴馬有力幫助美國經濟重回正軌啦。但諗深一層，佢又唔係金融財俊，又唔係搞夢幻嘢，只係一個做緊傳統貿易買賣的行業，假如佢對經濟前景咁有希望，莫非係香港之群眾收錯風？

響香港，日日遭到疲勞轟炸嘅係北方經濟好掂好犀利，上面經濟數據點出街，總有讚好之理由。CPI低咗，就話北京放水有望。PMI低咗，就話降速係好事，減少過熱。樓價跌咗就話人民不滿的聲音少咗，有利消費(吓！咁都得？)。睇到美國經濟，就猛話奧巴馬經濟團隊蓋特納得罪人多稱呼人少；伯南克QE黑過墨斗，提振乏力；失業率跌到7.8%嗰陣，就話奧巴馬為求連任，做數都做到跌破8%。響選舉嗰陣，睇到最多嘅就係嗰啲負資產炒燶晒，失業人士無嘢撈，治安惡劣嚇死人。

但對比番我呢位美國老友之言，似乎美國唔係咁簡單，唔係近排街外口水佬常常講之「兩個美國論」，即係one country two nations，一邊係民主黨之支持者，一邊係共和黨之支持者，兩個彷彿生活響唔同嘅世界，互相對立而又互不相讓。聽老友之言，假如美國經濟係有好大之動力彈起，依家係咪本地傳媒之主流論述，低估咗美帝之潛能呢？

所以，與其講「兩個美國論」，不如講係美國經濟發展出現兩極化嘅路線之爭。一邊係共和黨提到的減稅滅赤縮開支，一邊係民主黨提到之干預掟錢縮貧富。兩條各不相讓之路線之爭，亦影響緊全球出現經濟危機之國家。呢個大氣候，香港都唔例外。(二之一)