一個國家使大咗過頭，搞到破產，有錢國家救一把之前，就會叫佢地國民齊齊勒緊褲頭，共渡時艱，捱苦有出路，努力有回報。
問題係，有國家話，咪住！家陣唔係減開支，而係減過龍，減到入心入肺之後，投資者覺得我地無前景，無得救，唔來投資喎！街邊小商人劈價一樣賣唔去，有錢佬靜靜雞換晒美金散水鬆人，失業率如脫繮之野馬，咁落去，成個國家醫番都殘廢。喂！減肥之餘，都要刺激經濟㗎！經濟底子如果被削到咁孱弱，第日好番都無用。
上面係歐洲國家之寫照。法國舊年選咗個奧朗德出來，就係要同削赤大師德國打對台，當時佢話，法國都要重視增長，唔能夠一味削赤。結果呢？佢向有錢佬徵稅，加到75%，自然吵到拆天。但係，最緊要都係，點可能響唔減開支之情況下，又加以減少財赤呢？最終奧朗德都要向現實低頭，加消費稅，減少工資支出，以及削赤，係咪奧朗德向右轉？可以咁樣講。但係，工會已經警告，會大力反對。點都好，奧朗德支持率跌到歷任總統新低，只有35％。
至於英國呢？卡梅倫削赤減開支搞到倫敦大示威，幾乎反轉咁滯，佢提出之政策，似乎都仲係唔得，因為依家英國經濟開始講緊，未走出double dip，由於消費數據又弱番，有悲觀論者提到係未走緊去triple dip，即係又走番去衰退。當然，英國仲有兩年至會大選，卡梅倫仲有時間做下經濟實驗。但英國保守黨嗰套大刀闊斧削赤，雖然得到國際貨幣基金組織等支持，但係似乎只能令經濟兜兜轉轉，搵唔到出路。保守黨內亦有呼聲講緊，既然經濟谷極唔起，係咪都要調整一下策略，唔好一味搞量化寬鬆，如果唔係，兩年後保守黨政權都會凍過水，即係向左轉？
究竟經濟點樣至有活路？向左轉定右轉好呢？美國嘗試向左轉一些，已經有好多人吵到拆天。有人話，咁樣係斷送咗美國人拚搏向上之精神，養懶一班沒有競爭力，依賴福利之人士，自由變干預，遲早玩完。奧巴馬支持者話，貧富差距拉大，自由成放任，部分有錢階級的行為，壓縮緊其他階層之發展機遇，減少了社會流動，咁落去，所謂機會都係有錢人之專利。
美國同歐洲的經濟策略之爭論，其實響好多地區發生緊。香港人都想有轉變，所以當初就支持一個「支變」的領袖。但當真係要轉嗰陣（例如扶貧），香港人就驚咗，怕轉變會變亂，於是就想唔變，個心十五十六，遇到個領袖本身真係奧朗德咁嘅業餘水平，就寧願乜都唔郁，結果官民更不信任，管治越搞越糟糕。（二之二）
ADVERTISEMENT
送健之堂舒壓好眠足湯 x 石墨烯足浴袋
