上周港大民調中心有個《香港市民對各地政府及人民觀感淨值》之報告。好多傳媒朋友只係集中講，香港市民對北方同胞之好感極低，只有1%，對上面政府之好感更只有4%。
其實，報告最亮眼嘅，應該係負淨值嗰part。因為只有三個國家係負淨值，即係表示香港市民最唔like嘅三個「外部勢力」政府：排名第一係菲律賓(-74%)，第二係日本(-45%)，第三，居然係美國(-9%)。注意，係政府，唔係人民。特別嘅係，日本同菲國都係美帝之盟友。
有人話，港人因為釣魚台問題，唔like日本，但唔like美帝呢？真係無人知點解。但點都好，當有北方權威人士大鬧外部勢力藉反對派響香港奪權之時，我都真係奇怪，唔知佢所指嘅外部勢力，係乜嘢國家。假如係美帝的話就真係奇嘞，因為香港人都唔like美帝政府，點會咁輕易畀佢地幕後操縱呢？如果民情唔like美帝嘅話，只要有政治團體被揭穿有美帝財政支援嘅話，隨時市民反枱，香港政治團體係咪蠢成咁？
當然，你亦都可以指斥我天真，因為美帝無處不在，香港嗰啲唔親中之團體(包括傳媒)個個都收美國水，飲美國奶，或者美帝藉英國背後支持顛覆香港之政團等等，講到好似占士邦電影咁樣。呢類陰謀論就真係過晒火位。假如社會真係咁樣，基本上就係人人美諜，個個蔣匪，邊度仲有理性討論空間呢？實事求是些少啦！
因此，當一個國家日日係咁講外部勢力之時，點解佢唔係大大聲咁樣，指名道姓指住嗰個國家來鬧，直斥其非，好似喝住日本唔准掂釣魚台，喝住菲律賓唔好搞南沙，而係用「外部勢力」呢？點解要隱隱晦晦咁，反而指住自己國民係咁鬧，喝住自己國民唔好親近外部勢力呢？莫非嗰個「外部勢力」好強大，惹不得，於是唔敢郁手，只好遷怒自己國民呢？更何況，呢班國民都對美帝政府冇好感呢！
所以，講來講去，都係要搵理由收緊對香港控制。收咪收咯，香港人做嘢，素來講清講楚，唔會轉彎抹角。要收緊控制，北京有好多手段嘅，所謂特首述職、高官任命、人大法律審查權等，係明刀明槍，講畀你聽嘅。無話你聽嘅，晨早做緊啦。
響《基本法》附件三，有樣嘢叫做響香港實施之全國性法律。其實，過往十五年，已經送咗兩樣嘢：《中華人民共和國專屬經濟區和大陸架法》同埋《中華人民共和國外國中央銀行財產司法強制措施豁免法》，你有無印象響香港諮詢同討論過？睇埋《基本法》第十八條，你就知乜嘢事啦！下年送個《反分裂國家法》畀你好唔好？(二之二)
ADVERTISEMENT
送健之堂舒壓好眠足湯 x 石墨烯足浴袋
