一個只有四成支持度嘅領袖，點樣可以贏得連任？陳水扁就係一個完美示範。當然，先決條件係有兩個對手，咁至有機會出現票數不過半而贏選舉。
四成支持度係一個基數，因此，港大民調的走勢好緊要。Hello Kitty領袖的支持度，曾經爆上過40%，只要佢搵到方法(例如派錢)爆上去，自然有機會。
Scenario 1: 假設2017年真的有普選，佢一定會競逐連任。又假設為了促進競爭，建制派又有「唐B」之工商界陪跑，而泛民又搵一個「傑哥」出選。
於是，只要Hello Kitty擁有四成支持度的話，剩低之六成票，就會由「唐B」同埋「傑哥」瓜分。到時候，要Hello Kitty跪低唔難，只要有棄保效應，「傑哥」之票數轉去「唐B」的話，自然有偈傾。
問題係，按泛民最鍾意鬼打鬼兼內鬥的特性，「傑哥」一定俾泛民激進派狙擊，仲會叫支持者響「傑哥」門口唱爆佢，然後叫支持者杯葛不公不義嘅假普選。所以，「傑哥」得票唔會高。而且，「傑哥」之支持者都係泛民，係唔會全部過票俾「唐B」。
工商界識搵錢，唔識選舉，響無泛民全部過票之下，加上Hello Kitty領袖之老友梗會出陰招，唐B隨時只係最多只係近四成，唔係四成。咁樣，「唐B」輸，傑哥輸，Hello Kitty就可以四成贏。所謂「四三三」也。
呢度有個假設，特首可以無需要得票過半當選，無第二輪投票。
Scenario 2: 假設有第二輪投票，就會剩低兩個人對決。如果係Hello Kitty領袖vs唐B，泛民票數成關鍵。但唐B敢唔敢、攞唔攞呢？攞的話，北京會唔會發癲呢？北京會唔會同意建制加泛民聯合執政呢？ 響香港事務上，北京係一塊鐵板，處事出晒名僵化(處理外交又好有彈性，奇怪！)，政治上無想像力，一定唔會俾泛民執政。於是，北京就會出力幫Hello Kitty啦。又假如「傑哥」忽然入到第二輪，咁Hello Kitty連任就一定沒有懸念。
Scenario 3: 響2017年之普選，只有兩個人對決。假如只有唐B出來參選，咁樣Hello Kitty領袖一定贏。因為唐B係唔可能拿到泛民支持者選票，理由同上。又假如只有「傑哥」出選，咁Hello Kitty一定必勝，理由又同上。
當然，你可以想像好多不同之scenario。但係，基本格局就是如此。至於政改方案唔通過的話，就更加難倒Hello Kitty。Hello Kitty領袖同阿扁處境都幾相似，仲有一些人覺得要俾時間佢做嘢，有些人覺得佢下台之後仲有邊個肯做(當年挺董者都有如此論述)。但點都好，去年北京俾佢上台之後，佢依家坐定定，要佢倒台，難於登天。
因此，大家要有Hello Kitty領袖做足十年之準備。只有咁嘅心理準備，至可以有理有利有節地同呢個政府周旋。(二之二)