有啲嘢，講得多都會厭。例如Hello Kitty領袖。既然佢會響呢塊寶地盤踞十年，係咪應該思考一下未來呢？即係話，假如你有心從政的話，十年後你要點樣上位呢？
假如你依家開始做梁粉，又點樣計劃未來十年之上位路徑呢？你可以先響政府搞嘅blog成為會員，https://www.forum.gov.hk/ ，瞓身寫文章讚Hello Kitty領袖。行文肉麻一些不打緊，最重要係引起梁粉支持者注意，而且唔好咁似嗰啲親中報章之寫法就得。
畀一個template你試一試：「梁振英上台的時候，香港正遇上前所未有的困難之局：社會撕裂、經濟扭曲、政治對立。梁負上的就是如此巨大的包袱，所以他提出的改革倡議，必然受到既得的利益階層無理的抵制、反撲以至攻擊。打鐵還須自身硬，過去幾個月，梁振英團隊以沉著、有理、有利及有節的方法，以做實事為本，一步一腳印，穩穩妥妥，踏踏實實地提出政策，以事實來化解這些毫無道理的謾罵及肆意的攻擊，井然有序地推動民生工程，例如房屋政策……又例如環保政策……」
留意：Hello Kitty領袖鍾意用四字排句，記得響行文嗰陣，加上一些如「完完本本」、「清清楚楚」、「踏踏實實」等字眼，搭上些少key words如「實事」、「齊心」、「迎難而上」咁樣，自然會引起政府注意。寫多幾篇文章之後，再出席一下撐梁的諮詢會，結識一些梁粉之商人，偶然之間，說話激些少，多講一些「有建設性的意見」，人地有印象的話，就會邀請你加入去一些政府諮詢委員會(唔好咁心紅，去扶貧或關愛，嗰啲你仲未得)屬下的小組，例如紀念郵票主題嗰類諮詢委員會下的小組。
只要你乖乖地，講嘢正常，就會多幾個小組，如果你有機會埋堆中策組，咁就真係飛黃騰達啦，萬一你仲響度浮沉緊，唔緊要，兩、三年後，Hello Kitty領袖要連任選舉嘛，你就可以借勢加入梁粉嘅競選團隊，博佢連任之後，分餅分到你。即使分唔到政治助理，你都可能分到嗰啲大嘅諮詢委員會，咁樣，你張卡片，有成十幾廿個銜頭，拉出嚟成呎長，勁呀！而且，定時定候去電視台電台撐政府就梗㗎啦！十年後，四十幾歲，呎幾長之卡片，穿梭各界酒會，七一十一有你份，又可以同Hello Kitty領袖影相，隨時又同張曉明握手，仲想點？
所以，早一排有唔同時間遇上依家響泛民工作嘅八十後及九十後，真係向佢地衷心致敬。我後生嗰陣，響泛民工作係一件好開心嘅事。諗返轉頭，當時係同時勢有關係，因為港英政府知道民意所向，有意地捧泛民上去，好多醒爬嘅人自然會黐埋去泛民果度，令到泛民幾乎網羅唔少當時之有為青年加入。
依家幫泛民政黨做事，就要有做生命烈士嘅準備！(二之一)