唔爆一件當年響政府工作嘅舊事，真係唔舒服。
N年前響政府工作嗰陣，有一次同官員A傾緊佢嘅工作。正在八卦是非，月旦人物之際，官員A講起枱頭工作，忽然問：「有無啲關於可持續發展啲書呀、材料呀畀我？」
「你真係搵啱人。爆個秘密你知，我讀碩士嗰陣，最用心嗰科就係國際環境保護法。依家仲追蹤緊里約熱奈盧宣言之發展。我屋企啲書仲係滾熱辣也！」我說，順便講幾句學術也。
「不如整幾本過來畀我補下飛？」官員A曰。「依家呢班大帝講緊一啲好鬼虛無的東西，東拉西扯，唔知扯去邊。」
「當然無問題。」我說。結果嗰晚返屋企後，執咗兩本書，第二日透過internal mail去咗佢嗰度。後來，由於我散咗水，嗰啲書相信都去咗堆填，因為嗰個委員會亦隨住老董下台都潛咗水，委員會嘅作用性至少減咗一半。(警訊式模擬片段，如有雷同，實屬巧合兼不幸)
點解要講呢件舊事呢？十幾年前，有一班五十後之精英上咗位，入咗政府之後，好想改革社會。我地唔應該懷疑佢地有乜嘢陰/陽謀，總之佢地之心態，既有七十年代社會主義思潮影響之下的改革熊火，同時亦因為響八十年代享受咗高速經濟發展，以及受到英美自由市場經濟之影響，覺得香港未來，既需要社會改革，應該公平一些(呢個部分好鬼七十年代)，同時又覺得，改革之最大阻力，係來自AO，即係嗰班殖民地舊電池(好似共和黨成日講嗰套說法：政府才是問題)。
於是，老董上場之後，呢班大哥(絕大部分係男人)就想幫手改革社會。老董亦唔係蠢人，知道香港唔改革，真係唔掂。問題係，佢搵乜嘢人改革，點樣改革，同埋唔知點樣入手。唔知邊條友獻計，成立咗一大堆好有前瞻性，好有願景，好有口水之委員會，網羅咗一班五十後精英入去呢啲委員會幫手，吹響咗改革嘅號角。
響呢個背景底下，環保係一個好重要的項目。早響十幾年前，鬼佬公司已經嘈，環境污染好大件事，影響營商。老董好勁㗎，1999年話要成立一個討論可持續發展之委員會，籌備經年啦，2003年就係由政務司長曾蔭權主持，副主席仲係中策組嘅領導鄭維健博士，下面仲有萬七咁多個小組等，大家討論一下點樣推動可持續發展之方向同目標添。
中間做咗啲乜？詳情唔係好記得。只係知道，當董生講完之後，一貫嘅做法，就係交由公務員處理。問題係，點解愈處理就愈快消音呢？依家你仲記唔記得，曾經有一個可持續發展策略嘅框架呢？(二之一)
ADVERTISEMENT
