Hello Kitty領袖話，平均每個政策局只有一個委員會，講到好似冇乜事咁樣。唔識嘅以為真係冇嘢，識嘅真係畀佢笑死。局內有一個「太上皇」式嘅委員會，主席係外人，局長當然要出席。表面上，主席主持會議，威上威，局長要聽佢點，無咁威。實際上呢？主席唔係日日返工，唔會識得政策局嘅運作，事事都要靠局長幫手，於是，唔敢、亦唔會點局長做嘢。
局長亦知道，呢啲主席，同特首有紅色電話直通，講嘢都唔會去得太盡，大部分時間都會好聲好氣。問題係，局長唔識寫會議紀錄，唔會去call會，而副局長又唔多叻文書工作，唯有靠常秘指點下面之中級官員幫手。
一個政策局，日理萬機，做到嘔電，人所共知。依家上面整多個太上皇委員會出來，而委員會裡面，個個五十後「精英」都係「長於吹水、短於公共行政」之老細級人士。中級官員要支援，惡頂之至。中級官員平時已經做到氣咳，突然又落條單話支援呢個太上皇組織，於是手頭上嘅嘢，一係散番出來畀其他人食，一係就將啲嘢拖住嚟做。結嗰呢？嗰啲被迫接收佢地散出來嘅嘢之官員，自然MM聲啦。
公共政策啲嘢，好鬼邪。有啲嘢，拖下拖下，可以無事過骨。但有啲嘢，真係會拖下拖下爆煲，到時又會搞到倒瀉籮蟹，全個政策局要出來撲火。當政府要危機處理之時，局長日日忙到抽筋，邊得閒理呢啲吹水委員會呢？於是，局長有時會叫副局長或常秘幫手頂住，招呼或者出席一下委員會。委員會主席詐型又冇用，唔通響人地危機處理嗰陣，發晒茅去鬧局長唔尊重佢咩？但係，委員會啲成員，見局長好忙，自己手頭上生意又忙，又見到早前提出嘅政策又因為個局好忙而落實無期，心裡面心灰意冷。佢地口裡面扮無嘢，但開委員會嗰陣自然心不在焉。結果？呢類會就慢慢變成吹水會。
呢類吹水嘢，例如噚日講嘅可持續發展委員會，出咗一大堆嘢之後又開始被融入體制之中，可做之事情有幾多呢？有冇人知道佢上一次講固體廢物嗰陣，有乜嘢建言呢？又知唔知佢地已經由一年四次會縮到一年三次會，甚至試過一年開兩次會呢？Hello Kitty領袖響政治圈打滾咁多年，知道過去十幾年，咁多呢類委員會嘅「豐功偉績」，點會唔知道呢啲嘢有幾多成效呢？佢又點會唔知，好多呢啲吹水嘢，最後都會被融入體制之中，變成畀面派對之一部分呢？依家嘅問題係，Hello Kitty領袖明知呢啲委員會最終只會吹水唔抹咀，但又點解撲出嚟再搞呢？究竟係呃緊自己，定係呃鬼食豆腐呢？真係木宰羊。(二之二）