上周響上面搵食吹水教書的過程，有好深切之體驗，即係話，上一代成日講香港係乜嘢東、西方橋樑，係一個可以帶外國經驗畀中國之角色，基本上都係collect skin了。
即係點呢？上堂嗰班中國中級幹部，有人響外國留學，有人響外國長時間做調研，有人個仔女響外國讀緊中小學，有人外語水平唔差，講開西方政治都好鬼熟書，連依家Hello Kitty領袖嘅醜聞一樣知之甚詳。換言之，防火牆並無阻止到佢地獲取資訊。
好嘞，咁既然資訊、外語、國外經驗唔係一個阻礙，香港人響上面可以sell啲乜嘢呢？sell香港人好識西方事物咩？out啦，人地都識啦。香港人sell分析咩？人地都識得用自由主義、馬克思主義等基本框架去分析，而且仲會話番俾你知，邊啲嘢可以用，邊啲嘢唔適合用。香港人sell評論咩？咪玩啦，唔怕出唔到境返香港就得。
以前中國封閉，香港人響西方可以賣國貨，講中國，靠分析國情來搵食，依家唔得。以前香港人可以響上面賣外國貨，講西方，靠分析英美來搵食，依家好鬼艱難，因為上面啲資訊一樣快，教育程度高咗，唔輕易信你啲吹水分析。換言之，嗰啲香港某些outdated五十後，成日叫人裝備好自己北上搵食之時，查實連我讀到咁嘅教育程度，上去上面都覺得好吃力，咁依家八十後同九十後裝備啲乜嘢，北上搵食？唔怕畀人笑咩？唔好忘記，當人地講緊香港特首之貪腐嘅時候，口裡面就客客氣氣，個樣就係「你地咪係一樣」嘅O咀look，哈哈！
所以，了解中國唔係坐飛機去一兩日吃喝玩樂就得，又或者參加遊樂團就可以，而係響最細微之處睇上面之發展，然後再想想，當鄰居已經唔係以前咁樣嗰陣，我地仲要保住自己啲乜嘢，捍衛自己啲乜嘢，先至可以令自己站響高處，睇得更遠，無需去爭乜嘢朝夕。響上面食飯嗰陣，人地已經話，佢地聘請大學老師嗰陣，中國自己土產之博士基本上唔請，一定要請海外畢業嘅博士，至於香港出產嘅博士，由於好多其實都係中國過去讀嘅，人數太多，要逐個秤，睇清睇楚。佢講嘅嘢，我三年前響廣州都聽過。
響咁嘅情況下，我地有一班outdated五十後，叫香港人了解國情，叫八十後或九十後北上升學讀書，係咪真係out到冇朋友呢？佢地講呢番話，如果係發自真心嘅，即係對中國社會現實一無所知。如果係用來恭維權貴，講出來希望令某些權貴順耳的話，咁就唔係講真話，誤導緊自己人啦！
響香港，商界四、五十後壟斷咗北上論述，吹噓/吹捧一啲根本唔真實嘅中國現實。Hello Kitty領袖基本上只係附和呢種論述，各位朋友，需要細心咀嚼一下，佢講嘅嘢，是真還是假。(二之二)
ADVERTISEMENT
