溫和A行走江湖二十幾年，最近做咗說客。原來呢，早前咪提過，某一啲人曾經喺佔中商討日前前後後，提出過搞乜嘢溫和泛民聯盟，原本以為因為收咗檔，原來真係想靜靜雞復活。
我都覺得奇怪，因為依家呢個時勢，提呢個想法真係椽木求魚。泛民雖然有激進力量係咁死頂，現實上已經分咗家。北方人士經過一年半之堅持，經過喬老爺、非哥、甚至戈平叔以至德江叔之幾支大錘，原則絲毫沒不退，捱至依家，終於係泛民「屈服」。
呢個究竟係唔係「屈服」呢？你可以話係，又可以話唔係。因為喺政改之初，泛民已經有湯渣方案，集中傾提委會改革。只不過，呢個方案一直喺真普聯之討論中，被泛民一班大哥忽視。而且，喺泛民個個都大大聲撐三軌之時，講提委會改革會畀人唾罵。所以，你唔可以講泛民屈服，因為提委會改革，一早就有，只係除咗湯渣等人之外，其他之泛民政客唔肯公開支持。
你又可以話屈服，因為喺北京堅持再堅持之下，乜太同湯渣呢類改革提委會之呼聲，卻因為5.6佔中商討日，自稱溫和之部分泛民決定同激進割席之後，又復活起來。呢種分裂，其中一個理由，係部分自稱溫和之人士話，北京唔支持公投，政改咁樣搞落去，真係無辦法有deal，所以要務實一啲，集中講提委會改革，又或者用依家呢個講法：「提委會民主化」。
「提委會民主化」呢個口號都幾荒謬。因為如果唔係一人一票選出提委會委員，理論上提委會係一個篩，用作篩走參選人，乜嘢人可以出線，視乎個窿有幾大。提委會本身就好有篩選之意味，本應不該存在，依家提出民主化，即係將一個不民主之制度合理化，真係幾諷刺。部分泛民用呢句咁嘅口號示人，難怪部分自稱溫和派之人士又畀激進派攻擊啦！
講番轉頭，溫和A話，一班元老收到風，話北方希望好似兩年前咁樣，有一個比較似樣之對口單位，好過依家咁樣，逐個約見，費時失事。而且，有大老意見認為，既然要搞一個對口單位，亦唔應該只係一班人聚埋一齊，而係應該有一個C(即仁超叔之普通話，「勢」也)，一個整合全宇宙之溫和方案，咁樣呢個對口單位就可以拎住方案去西環傾。同一時間，呢個對口單位就成為一個大聯盟，日後好打得三人組就可以同對口單位對嘴，清清楚楚。
溫和A話，上面既然有呢個聲氣，佢咪四圍問下人，有人覺得OK，有人唔係咁積極，有人say no。佢估唔到出動到一班民主元老，反應都係冷淡。
我話，唔好咁傻啦，溫和A，係人都睇到，又係元老call 社會各界人士喺旁邊搖旗吶喊，幫元老抬轎送佢地去談判威威。兩年前，班元老已經碌爆咗社會各界人士之人情卡，結果幾乎所有溫和派都畀人插到飛起。依家班元老又想重施故技？冇人想佢地抬轎啦！睇埋尋日嗰份一國兩制白皮書，北京唔放權就唔放權，乜嘢聯盟呀之類，有乜用？