昨天講到，溫和A受命泛民元老，走去同人傾聯盟，結果唔係咁理想。有人say ok，有人唔係好受，亦有人say no。原來，自從5.6商討日之後，呢個聯盟夢一直無幻滅到。主要原因，聽聞係元老收到北京啲風，話上面希望有一個聯盟喎！溫和聯盟本身係相當笨實之建議。
首先，假如，真係假如，上面係希望有一個聯盟，就要先估量一下，點解上面要有一個聯盟呢？單手拍掌拍不響，依家上面睇到，再係咁樣搞落去，北京提乜嘢方案都唔會過到立法會。北京都心急㗎，好希望有一個C(即勢也)，最好就係泛民有一個聯盟，一齊拍掌，再拉埋三人組響旁邊舞埋獅頭，咁就可以營造一個良好氣氛，有得傾同埋有機會贏之氣氛嘛！
又或者，上面係希望，借一個聯盟嚟達到佢心裡而另一個目的：全面擊潰溫和派。我地又假如，真係假如，溫和聯盟搞得成，而且又好似好有聲勢，仁哥卿姐、張李楊湯等拎住一個溫和整合方案同京官談判，點知上面將呢個方案打咗七折咁樣彈番畀個聯盟，咁樣聯盟又點樣面對呢？如果七折唔得，變八折呢？甚至八五折又點呢？呢個情況，就好似三年前政改咁樣：當時上面淨係ok咗超級區議會方案，食定唔食呢？最終部分溫和泛民肯食，結果佢地響區選立法會選舉輸到一仆一碌！歷史會唔會又再重複呢？上次溫和力量大捆綁，每個溫和派人士之社會信用卡碌到爆晒，選舉嗰陣被「票債票償」，記憶猶新。唔係嘛，依家又將精力放響籌組大聯盟身上，係唔係又想再歷史重演？難道泛民元老又失憶？如果唔係失憶，咁又點解相信，呢個溫和聯盟有利同北京談判咩？唔通上面響新一屆領導下，忽然間轉性，願意同溫和泛民建立一個恒常之溝通機制咩？小明哥上個月響上海，夠話會加強同社會不同團體接觸同溝通，依家近兩個月了，做過啲乜呢？前日上面又整份白皮書擺明挑機，我睇唔到上面有誠意同乜嘢溫和派傾噃？想談判嘅朋友，唔好幻想一個聯盟可以齊心做嘢。
三年前政改，已經見到溫和聯盟會成為激進派日日攻擊之對象。假如，又係假如，溫和力量分散，激進派冇一個集中之對象可以攻擊(除咗白鴿黨)，但假如結合，激進之嗜血部隊就會日日去攻擊及吞噬呢個聯盟，唔通仁哥卿姐湯渣真係好得閒，日日同嗜血部隊針鋒相對咩？早幾日湯渣之星期日論壇就見到晒啦！你可以幻想一下，真係幻想：一班溫和聯盟之學者，日日要響面書、電郵、報章去回應批評，疲於奔命；一班泛民元老去完西環/深圳/廣州/北京/上海之後，俾人鬧賣港、港奸而唯一支持佢地嘅就係親中報章之文平理同楊堅。咁樣嘅聯盟，淨係做回應都已經散晒，又點可以專心地談判呢？又假如，搞一個溫和聯盟係上面之意思，咁點解泛民大老咁順攤，按上面之意思去搞呢？北京叫你就做？仲聽話過北韓？我真係想唔通。