有一種政治討論之策略，前年身痕痕，揸住六千蚊，走去學車諗住將來搵真銀。係㗎，我都要為日後被劈被封咪封嘴冇得撈嘅情況之下，馬死落地行鋪路，因為聽聞，學鄭x穎個廣告咁樣，著住件制服講「call 我啦」，做外賣仔，都有皮幾嘢收入。結果就膽粗粗，連單車都唔識踩之下，走去學電單車。
當然，跌到傷晒唔在講，最惡頂嘅其實係斜路打「8」字圈。除咗手腳要協調，仲要平衡力兼陰力，如果硬繃繃咁打圈，隨時飛出界。有一次就想好瀟灑咁扭右上斜，點知右手畀油力度過猛，呼一聲，架電單車飛咗上天，人就撻咗響地，好彩有個頭盔頂住，如果唔係，真係踩入醫院都似。威？要有代價㗎！
美帝前高官佐力克(曾做過美帝貿易代表，同中國有唔少交手經驗，算唔算反共呢？好難講，美帝政客內心九成九反共，但有一半以上好務實)最近寫咗篇文講中國政局。佐生素來都唔係食中國條水，又唔係中國老朋友，而且佢嘅論點，表面上真係阿爸係男人：佐兄話，依家上面之領導人，依家最重要嘅工作，係維持共產黨(管治)，而且依家佢地做嘅係經濟結構及制度之現代化，政改？No way，因為風險太大。
不過，佐生有一個觀察，響美帝前官員嚟講，算係好中：佢提醒美帝，依家呢班新領導，對於national pride(我姑且譯作國家榮譽)睇得好重，佢地希望中國崛起，得到外界之認可及尊重。佐生形容，呢樣嘢亦有助中國管治之合法性。佐生呼籲美帝及其他國家要將中國進一步拉入國際社會，與國際社會結合，以平衡中國崛起之影響，減少未來之不穩定性。
我嘅演繹係，佢希望美帝明白，呢樣中國領導層之歷史使命，所以美帝要畀北方人士威威，另一方面又提醒北方人士要戴頭盔，因為一意孤行，唔同國際接軌的話，一樣要有代價。
佐生講嘅係好宏觀之東西，但放響香港呢個context，一樣apply。好多人覺得白皮書將原本收收埋埋之攞你命3000，就好似國產凌凌漆嘅聞西一樣，曬晒出嚟，等你班Xiang Gang Ren聞風喪膽。但各位震一震之餘，都應該冷靜諗下，點解要響呢個時候亮劍呢？
好明顯，上面好心急。因為既然十八大有關港澳政策方面，特首普選係一件最重要嘅工作，如果做得到，就係依家領導層之政績，真係好有國家榮譽及歷史任務，名垂千古。既然係咁重要，由上到下自然當佢重中之重，萬一傾唔掂，按依家領導人之性格，人頭落地都有之，你懂的。但係，假如響普選之後，居然出事，有一啲唔想見之茂李贏咗，搞到中共政權丟失畀泛民又點呢？一樣會人頭落地，所以就要戴定頭盔，左防右防。
所以，既然上面要威要頭盔，泛民就應該有技巧地既迫且夾適時回應北方之攻勢，而唔係齋聽上面支笛，搞乜嘢溫和聯盟。試想下，假如兩個星期前搞咗聯盟，上星期整個白皮書出嚟，嗰個溫和聯盟仲唔畀人狙擊到暈？
至於我考電單車？Well，做咗路試逃兵，到依家都未考到！