晨鳴紙業昨收市報3.25元，無升跌。
晨鳴紙業(1812)家陣得7倍市盈率(PE)，兼高達11厘息，行家中，晨鳴呢啲數據，流晒口水。
晨鳴主打高檔紙品生產，係全球行家中30強，兼且係唯一一間，有社保基金做股東嘅紙業股，威到爆。
上年，喺全世界睇淡紙業之際，行頭就谷底回暖，晨鳴純利大升咗2倍，到7億銀(人仔。下同)，兼每股派0.375港銀股息，現價(3.25港銀)息率，高達11.6厘。
又據行家玖龍紙業(2689)掌舵張茵本周初講，今年上半年紙價大致平穩，相信下半年，尤其包裝紙需求比較好，有提價空間。
睇到係，紙業回暖勢頭持續，晨鳴喺行內又有競爭優勢，今年成績單，應該穩中向好，PE再跌到得6倍，兼keep住呢個勁吸引高派息。而上邊行家玖紙，今年預測PE去到9.8倍，兩厘息、理文造紙(2314)8.5倍預測PE、4厘息，點睇，都係晨鳴最吸引。
再講，晨鳴呢期開拓埋好似紙巾、尿片、衛生巾等等生活用紙。晨鳴已經有晒經銷網，呢壇製作，一煲得掂，身價肯定唔止咁。睇睇場內經營生活用紙嘅恒安(1044)，市場俾佢PE，高達22倍，就可見一斑。
買晨鳴，當上番理文造紙個預測PE水位，晨鳴都要升40%，到4.6港銀，而呢個目標價嘅息率回報，仍然高達8厘，有咁高息墊底，就算港股再橫風橫雨，都冇有怕。
作者為中細價股專家