上周飯局，朋友問買乜好，筆者答「唔知」，全枱靜咗三秒。做基金經理最尷尬的唔係睇錯市，而係被人發現你真係唔知。
唔係冇嘢想買，只是除了反覆提及的三四隻，其他計完都唔夠平。股價雖近一年低位，但美國長期利率極高，估值容錯空間已縮水。
先講原材料：記憶體短缺與中東戰事推高成本，轉嫁客戶有數月時差，有些公司的代工合約更多是死價，成本今日升，價錢出年改，中間嗰段叫做捱。其次是社保，收繳改由稅局代收，繳費基數大幅提高，不少管理層直言對淨利潤影響由5%至20%不等。最後是追稅，近來內地積極追收企業及個人過去未繳的稅款，有些追溯到25年前，對消費及資金流的影響仍屬未知。
結論唔係清倉，而係將精力移向與這堆變數無關、現金夠厚、派息有保底，首選仍是和記電訊香港(215)。筆者2022年及去年12月兩度介紹，結論都是鎖定近7%股息；三年來股價原地踏步，7厘息卻照收。新的催化劑是業績措辭——聲明的藝術往往在於刪咗乜。2024年年報主席仍要「物色長遠的增值機會」，2025年年報這句併購味濃的話消失，改成「重新審視股息政策」；今次中期再進一步，明言「將於審視集團2026年全年業績時，繼續檢視現金用途，以進一步提升股東價值」。此外，主席更在股東會明言特別息是選項之一，所以筆者認為時間表已寫在紙上。
估值方面，以執筆時1.13元計算，市值約54億元，淨現金約37億元，按去年每股派息7.49仙計，基本情況照收6.6厘，如派息有驚喜則有不俗上望空間。同類亦可留意筆者反覆提及回購派息積極的歡聚時代(JOYY)。投資最難的不是睇淡睇好，而是計唔到數時肯忍手；先鎖定袋得到的，再等袋不到的驚喜。