冇乜好傾

親政府中人不斷響媒體放兩類風。第一種，就係面對現實論，總的來說，就係叻嘅政客，既有理想，亦要照顧現實。理想唔能夠唔睇現實，大智慧者必然能看穿現實限制而會有所作為。第二種就係空間論，即係話，落咗閘唔代表冇得傾，亦唔應該灰心，嬲完發晒火之後咪企埋一齊傾。

第一種論述，假如講畀1962年李光耀聽，叫佢接受新加坡被合併馬來西亞聯邦係一個現實，唔好再妄想獨立，你估李光耀會點？佢會接受被合併之現實，但轉頭就想方法搞獨立，但佢係唔會甘心被現實所困，從此唔要立國之理想；第二種，就係以前親政府人士之袋住先version 2.0，講多無謂。

作為十七學者＋一個學棍(我唔係全職大學老師，出名誤人子弟)之方案成員，依家公民推薦方案正式被北方掃進佢地之歷史垃圾堆，總算件事告一段落，咁就可以好開放地講下過往半年以來之感受。

方案提出之後，最令人失望嘅並唔係北京或者三人組。坦白講，絕大部分成員都知道，上面唔會咁順攤接受方案，而三人組嘅政治能量，特別係同北方爭取嘅能力，同貪曾年代差好遠，所以，至少我呢(唔敢代表其他十七個)係抱住唔得就算，無需強求之態度去睇成件事。

但後來發覺，原來所謂同路人，唔係呢回事。有啲好想同北方談判之同路人，依家有兩大怨氣：其一，點解死都唔肯整合搞一個聯合方案；其二，點解死都唔肯共同倡議一個談判平台，齊齊爭取呢？好似將依家上面「落閘」之責任，推落去係泛民所謂「溫和派」唔團結所致。

回想方案起初之時，三人組忽然話睇來唔係唔符合基本法，一班人撲出嚟話要搞聯盟。我就覺得，搞嚟好多餘，因為依家係北方話事，北方想要乜方案就乜嘢方案，一班學者同退役政客再加離休高官就可以同北方平起平坐傾方案？唔係嘛？學者們憑乜嘢同北京傾？響立法會有票嗎？唔通學者可以指揮議員之投票取向？如果議員真係咁廢又冇乜支持，點解佢又會贏到選舉呢？

講番轉頭，依家北方落晒大閘，難道一個整合嘅溫和方案就可以扭轉乾坤？假如北京從頭到尾都冇想過要讓步，呢個聯合方案(if any)咪一樣死晒火，係未？

至於談判平台就真係好無聊。一班前線之議員走佔中搵激進聲音支持，而同一個政黨內有人就去搞談判，真係體腦分裂。呢樣又回歸到一個現實，北方響今次政改係一個主導嘅角色，情況就如財爺之預算案一樣，鍾意嘅咪聽下政黨提出嘅有關預算案之意見，唔鍾意嘅就一句財政困難就say no，因為佢睇穿班議員唔夠膽否決撥款議案。同一道理，係未有一個談判平台，北方就會踩你咩？作為學棍，最灰嘅係，有部分同路人始終唔願意接受，佢地做錯政治判斷，以為可以同北京平起平坐。呢樣嘢先至係最令人沮喪嘅事。既然係咁，反正冇嘢好傾，潛心工作之餘，撐學生運動，冷眼世事，未嘗唔係壞事。