粵海置地密晒籠

廣東粵海系當中，最有機會搞重組注資嘅，係粵海置地(124)，實際市帳率(PB)又最平，散戶街貨得18%，股權又「密籠」，有得諗。

粵海一門四傑，水務粵海投資(270)PB兩倍、造皮革嘅粵海製革(1058)0.76倍、馬口鐵的廣南(1203)0.44倍，上年尾先改名(前身金威啤酒)兼主打房產嘅粵置0.68倍。

表面上，粵置只係系內第二隻PB最便宜之選，但集團揸住深圳布心片區原啤酒廠，樓面500萬方呎土地儲備，家陣仲仍然以廠房價反映。呢幅地價值浮面，粵置每股資產值係去到4.25元，PB得0.4倍，係四傑中最平。

故事未完。粵置係廣東直轄房產旗艦，諗到係，粵置俾阿爺湊大，好順理成章。又粵置既然係房產旗艦，包括粵投上百億銀嘅投資物業資產，最終係咪要理順轉手過俾粵置？

粵置家陣市值，得28億銀，手頭淨現金30.6億銀，都超過佢市值，粵置現價(1.72元)翻一番，市值都係得60億銀，未有耐夠size去啃過百億銀資產。

又粵置阿媽粵海控股，揸粵置73.82%，大孖沙Genesis Fund另hold7.81%，散戶街貨得18%，粵置幾乎密籠。街貨咁乾，一有資金埋身，又或者阿媽注資，粵置曉飛！

買粵置，當翻1/4番到2.1元，仲未上番1年高位2.55元，PB亦只得0.54倍，未有耐炒過龍。

作者為中細價股專家