愛找老店訪問的我，在每次訪問完結前，總問有沒有接班人，有43年歷史的筲箕灣南龍冰室，因沒有接班人而結業，幸得年前有投資者買下招牌，使冰室能重新開業。舖址雖改變，新店仍保留自製麵包、雞批，並可以同時點選對面餅店「壹餅房」的西式甜點，在傳統下添些新玩意，摩登中不帶點俗氣。
小店設樓上雅座，格仔地磚、木枱木凳、洗水米牆等帶些昔日的格調。去冰室，當然要食個菠蘿油及飲冰，可惜當日紅豆冰賣光，惟有轉飲凍檸蜜，細看餐牌寫有西式甜品，便試杯荔枝玉露。菠蘿油賣相頗佳，包皮不散，包身鬆軟，牛油略薄，稍化微溶，若厚些更好；荔枝玉露則是荔枝奶凍，奶香滑嫩，荔枝味淡然其中，內用椰果粒鋪底，新舊甜食共冶一爐，負責人指要兼顧人客口味，師傅每日早上焗包，下午則做西餅及甜品，所有出品均不會過夜。除做甜點外，飯麵亦做得不錯。
麵選蝦醬雞扒炒公仔麵，對我而言，公仔麵比其他麵難炒，多油炒變油撈麵，少油會易炒燶及黏成一團，小店炒得條條分明，不油膩，乾身原條，每條麵沾滿蝦醬，醬香濃郁撲鼻，雞扒厚身有肉汁，碟底沒有多餘油分，不消數分鐘已食完；友人揀金磚焗咖喱牛腩飯，整個金磚約高13厘米，師傅先將方包焗香，後挖空包心，包心內藏蛋炒飯及咖喱牛腩，再焗5分鐘便可。飯粒乾爽，咖哩椰香味重，冶味不辣，撈飯一流，牛腩入味軟腍，隨飯附上一碗咖喱汁，可作蘸方包，又脆又索汁，飯餸分量多，確真滿足。
前景驟看不清，很多事情雖不容自己決定，但仍可判斷哪杯茶是適合自己的，昨天是追月夜，雲掩月光終可見。
南龍冰室：銅鑼灣敬誠街1至3號地下及1樓 電話：3106 0820
壹餅房：銅鑼灣邊寧頓街18號廣旅集團大廈地下3號舖 電話：3583 1719
四處搵食，尤喜懷舊食物，愛好下廚，搵人做白老鼠。
ADVERTISEMENT
至抵會員價，名額有限，請火速訂位！
