技窮王維基

白手興家嘅企業家，馬暈真心佩服嘅無幾多個，如果要我數手指，王維基應該在第一隻手五隻手指就會數到。

如果香港有個幫派叫做「香港醒目幫」的話，王維基係必然嘅幫主。一個由零到有，敢於喺大財團面前放低1蚊挑機，仲要係挑機成功個隻，再加上喺鏡頭面前自信心十足嘅樣，點會唔係醒目幫嘅領袖？不過任何幫派幫主都有退位嘅一日，王維基的而且確出現「技窮」現象。

王維基旗下香港電視拎唔到免費電視牌，最終無選擇之下，惟有將已經拍好嘅劇集，以網上串流方式播放；從無線角度去睇，就係無得喺85、81台播放，只係靠myTV。呢個方式絕對係對香港電視迷嘅一個重要測試，由返屋企按一按搖控就可以睇電視，改變為無時無刻都可以透過手提裝置或電視盒等追劇。

這種追劇模式對好多後生仔女都唔會陌生，相信唔少人都係咁樣追看「來自星星的你」等等大熱韓劇，於香港市場照計都「應該」有出路。不過「星星」人家真係有兩粒大星，但你港視劇集質素點樣比無線高班，人腳始終畀人一個香港超級聯賽嘅感覺，永遠都去唔到英超嘅水平，係絕對製造唔到Noise。

從香港電視公布嘅最新收視數字可以見到，佢地嘅觀眾人數同剛剛開台嘅熱鬧有好強烈對比，我估計王維基依家都唔敢諗再開新劇，事關過百萬一集嘅製作，回本根本係天方夜譚。

最近佢地嘅網上商場正式上線，就更令到馬暈相信，王維基技窮至此。無錯，港女係幾鍾意網購，但佢地網購嘅平台係有過千萬貨品選擇嘅淘寶同韓國GMarket，唔係「基Mall」上面熟口熟面、港九新界都買到嘅貨品。小弟「行」過一轉，真係快過我行完得零食賣嘅759，想像唔到佢地生意模式點樣持續落去。

原本想寫話亞視收檔或者王維基有一線生機可以投到個牌去搞，但諗落一統江湖嘅震英幫梁教主一定唔會畀王好過，所以諗來諗去都睇唔到港視條路點行落去。或者香港都已經唔再適合醒目仔生活落去……