任天堂老翻玩唔過

曾幾何時，打機必定係打老翻，土下座細細個玩紅白機，已經有抄碟呢樣嘢。無他，市場99.9%都係咁做，莫講過細路仔，連大人都「乜唔知原來有正版？」直到PlayStation年代，因SCEH出力狂打翻版，情況先叫開始有好轉，近年再因為流行上網打機，要同朋友玩就要用番官方服務，就更加令老翻遊戲完全絕跡咁滯。點解無啦啦又講舊史呢？皆因老翻呢樣嘢，其實唔存在嘅地方只限香港，大陸一直都有班老翻fans，連你以為冇老翻嘅3DS，去「沒假貨(馬雲話)」嘅淘寶一搵，都可輕易搵到所謂燒錄卡，不過偏偏任天堂對老翻玩家出手從來唔留情，早兩日就流傳，所有曾經玩過老翻嘅3DS已經被鎖，從此冇得再上網打機，所謂老翻仲包括使用過任何辦法破解嘅正版遊戲帶。事件影響嘅唔止係老翻玩家，甚至乎二手市場，皆因你唔知上手對部機(或遊戲帶)做過乜嘢。講到尾，任天堂對呢樣嘢從來唔留情，想放心，現階段只能支持全新100%嘅正版嘞！