兜轉原生態

乳品類由上年年頭插到年尾，上個月開始有彈勢，當中嘅原生態牧業(1431)，有盈喜機會，兜轉原生態。

上年，因為供應增加，奶價下跌問題，祖國乳品股全世界無運行，插足一年。但大孖沙滙豐認為，呢個係行業周期多過結構性問題，更重要係，消費者需求改變，增加對乳品需求，應該會推動行頭增長，而祖國乳品股已經過度調整。

又啱呢個月頭，全球乳品貿易指數錄到9.4%升幅，兼係2013年4月以嚟最大升幅，市場就預計，或者係奶粉價谷底回升嘅signal。呢個消息入市，引發乳品股急彈，而當中，現代牧業(1117)由上年12月9號見1年底1.88元，到家陣彈升咗56%，原生態由12月中見1年底以嚟，升咗40%，但仲未追到現代牧業升幅。

又場內專業評估，原生態就快派2014年度成績單，每股盈利0.146港銀，增長近30%，原生態現價(0.95元)喺1年底浮沉，預測市盈率(PE)跌到6.5倍，有得博盈喜之餘，比起場內行家，好似上邊現代牧業預測11倍、雅士利(1230)27倍、輝山乳業(6863)10.6倍，同大哥大蒙牛(2319)27倍PE，原生態平咗大截。

趁呢期乳品股keep住有勢，兼有交投，快炒原生態，當翻1/4番，去到1.19元，預測PE上到8倍，仲未去到上邊行家嘅PE水位。

作者為中細價股專家