寫稿佬如我，不同欄目，有不同定位。呢度嘅讀者，相對比較廣闊，所以不可能寫一啲自娛為主的東西，而係要比較貼身之內容。有時候，講事件背景的東西比較少，喜歡單刀直入，而且往往都係隨著事件發展之流動，就講一啲未來可能好快發生嘅事。
大家有冇發覺，最近泛民裡面慢慢出現番，可以考慮袋住先嘅聲音。
有留意本欄之朋友，大概估到我講乜嘢。不過咁樣，都係要recap些少背景。大家先將個記憶，放響佔領公民廣場以至佔領中環呢件事上面。俾些少當時沙盤推演嘅局勢等大家回憶下。
響831決定之後，當時個個泛民咪激到飛起(貌似)，於是，泛民議員個個拍晒心口，好似上咗身咁樣，有啲交足戲，直情有泡眼淚響個眼眶裡面，就快滴落嚟咁樣，呢個經典囉，連聲稱自己係好溫和嘅泛民都話否決，政府政改凍過水啦。
大家又係未記得，當時佔中嘅朋友，猛話好快佔中，又話就快佔中，亦話已經準備佔中。個個泛民議員都話要加入，齊齊去馬，唔怕訴訟，唔怕俾人告云云，喪失議席？冇所謂云云。
其實，當時已經有人分析，呢班大哥大姐，個個義憤填膺，實際上就係做場大龍鳳，等警察叔叔拉完之後，好快就出番嚟講，要好務實地去做應做嘅事，面對現實，然後又等上面拋一個方案，等佢地可以不失儀態地轉身含淚支持袋住先。
點知，呢個如意算盤打唔響……住。因為有一班不知天高地厚嘅學生，走咗去乜嘢重奪公民廣場，兼且又俾慈母強力彈壓。響學生及青年聯手推動之下，佔中提早出現，泛民老餅提前揭竿(唔係起義)，泛民議員又被挾上戰車，點知慈母又唔跟劇本做，居然玩放催淚彈，令事態一發不可收拾，變成雨傘運動，搞咗七十九日至收工。
好啦，七十九日後，香江回復「常態」之後，即係點呢？即係政局又係回到九月中咁樣「正常」囉！該做嘅佔中已經收工，下一波咪就係剩番一樣，上面應該做而又未做嘅事：就係畀一個機會，等部分泛民議員可以華麗轉身。
之前我都同大家講過，要睇泛民會唔會接受袋住先，關鍵唔係議員，而係睇學者。因為泛民議員素來論述力不足(懶惰而已，與人無尤)，好多時係由學者打頭陣，幫手搞好個論述，同埋「導正」社會輿論。一俟社會輿論真正明白「大局」之後，部分泛民支持者就會對泛民華麗轉身，由反對變成同情，再可能由同情變成諒解。換言之，泛民議員會唔會願意拋個身出嚟轉身，關鍵係泛民學者之態度。
好啦，最近部分泛民學者之態度又點樣？大家睇下呢兩個星期，曾經係香江第一公信力報章之論壇版，有冇出現winds of change呢？哈哈！大家記得，要睇清楚啲，哈哈！
你話呢？
ADVERTISEMENT
送健之堂舒壓好眠足湯 x 石墨烯足浴袋
