身為中國人的悲哀

原本呢篇稿諗好嘅題目係「新辣招進一步穩固樓市」，講下香港最偉大樓演陳德霖嘅新招有幾咁荒謬，不過剛剛前日股市嘅突發事件令到馬暈再一次睇到中國人嘅劣根性，不得以要暫時Hold住陳德霖，先講咗我地身為中國人的悲哀。

前日星期一，中港股市嘅環保板塊升到嘭嘭聲，並唔係即將開嘅人大政協會議將會有咩國策去扶持，而係一部紀錄片。

一位叫柴靜(其實柴小姐喺內地好紅下，係我地呢類港燦孤陋寡聞)嘅央視前主播，自資過百萬去拍咗一套叫《穹頂之下》講霧霾嘅紀錄片。呢套片單單一日，喺騰訊嘅視頻網站就錄得超過1億點擊率，即係13個中國人有1個人睇過，如果佢係一套電影上畫嘅戲，30蚊人民幣一張飛的話，票房高達30億人仔！

套片一播成名，仲要有負責環境保護嘅官員就呢套戲作出回應，醒目仔就即時埋位炒起一堆環保股，香港嘅代表有協鑫新能源(00451)，星期一大漲23%收市，大隻嘅中國燃氣 (00384) 都可以踢高近一成。

成件事只不過係靠一個話題去把握投機嘅機會，有幾可悲呢？

霧霾本身並唔係新聞，好多年前大家都意識到呢個問題，更加有唔少北方人近年嚟到香港都要買一堆N95口罩，預備返屋企時有得抖啖過濾咗嘅空氣。霧霾同埋沙漠化等等嘅現象，都係祖國改革開放之後追求GDP高速增長嘅惡果，要解決呢個問題唔係單單靠一個環保部門就足夠，可能涉及一啲國策方針嘅轉變，例如要閂晒所有污染嚴重嘅工廠，或者要求工廠符合更嚴苛嘅環保條例，但咁樣就會影響經濟增長等等重要目標，最終就變成官場上嘅忌諱，唔係咁多人夠膽講。

一個理應由全個社會一齊及早去解決嘅問題，就係因為身為中國人嘅忌諱，你唔夠膽講我唔會出聲先，一味死拖，去到星期一柴靜嘅紀錄片一出，竟然又會爆發成為一個「新話題」，咁樣唔係可悲係乜？

沒有最可悲只有更可悲，我見到有祖國網民留言炮轟柴靜套片偽善，直Quote網民「疊夢驚情」原文：「柴靜不喜歡中國的霧霾，可以移民到沒有霧霾的國家，但是任何人都無法阻止中國的現代化，都不可能讓中國倒退回石器時代。這個國家的13億人民要擺脫貧困，要生活，不能因為柴靜生了一個有病的孩子，就讓企業停工，讓工人失業。中產階級希望能夠像美國人那樣開車代步，不能因為柴靜生了一個有病的孩子，就砸爛自己的汽車。」窮得只剩下錢嘅可悲！

馬暈未收過港大民意調查電話，如果上星期佢打來問我，我都仲會話自己係「香港嘅中國人」，但今日收到電話，我會話自己係「香港人」。