特區政府預計下月中公布第二輪政改諮詢結果，其後會提出具體政改方案，希望在今年中交由立法會表決。
嗱嗱嗱！我真係冇內線㗎，昨日已經講過，英國佬用盡牙力，出盡死力，用嘅力度，同肥彭當年夾票支持政改方案嘅力度，真係可以旗鼓相當，真係幫袋住先夾票出晒面。你睇睇，交稿當日，即係前日，阿乜太就提出咗候補人方案。點都好，呢個候補人方案，前提都係冇反對831決定。我就解讀為，響831決定之下，嘗試搞出一個所謂優化方案。但係，九月初嗰陣，乜太佢地唔係大聲反對袋住先嘅咩？
嗰日同乜太出席嘅記者會，有公文袋嘅核心成員，更有最重要嗰個鬼佬金主佐治。喂！大家唔善忘，佐治響香江之政壇好活躍，對香港公民社會之建立，出錢又出力。所以，響佢之大水喉下，有啲組織雖然唔活躍，但係就仍然存在，有啲組織好活躍，但大家唔知原來都係有佐治嘅支持。乜太嘅組織，佐治出錢又出力。有個講民主，響九七年前響親英上層及專業人士都幾活躍（九七前仲有立法局議員添），九七年之後潛水嘅組織，近幾日又出電郵希望大家響接受袋住先之下推進民主，原來又有佐治的身影。至於一個好講專業嘅聯盟性組織，又係佐治嘅支持下，選立法會功能組別非常勇進，而依家又有兩個立法會議員，係呀，都有鬼佬佐治的身影。
英國佬講到明，出晒口術，希望市民袋住先，呢啲畀人覺得係親英嘅人士，就紛紛歸位。未歸位嗰啲呢？我唔識答你咯。但係，如果英國佬，真係有能力響社會上，做到接受袋住先之氛圍，對穩定香港社會局勢有利，唔會話冇回報，係未？如果英國佬，透過手上管道，能夠更進一步，一帶一路，帶出一條投票之路，夾走泛民至少兩票，獻畀北京，未嘗唔係符合國家（指英國）利益，係未？
英國佬點會唔支持袋住先呢？五月英國國會大選，保守黨依家有贏面，但未能贏盡，工黨想翻盤，但未見曙光，第三勢力之自由民主黨，好可能會被泡沫化。英國經濟未見起色，上上落落不大，所以就需要外部勢力幫手支持一下。工黨仲有好多意識形態考慮，同中國未能咁friend，但保守黨班大帝，外交及政治上，毫無包袱也。中國響英國施加貿易影響力，投資影響力，振興到英國經濟，英國政府點會反對呢？仲要夾道歡迎呢！中國班領導層，點會唔知呢？英國佬分得利益，保守黨大選勝利，中國資金湧入英國，倫敦欣欣向榮，響英國眼中，香港有冇民主，又有乜所謂呢？
大家又可否想到，依家上面欠五票就可以過到骨，英國佬響香港之代理人，幫手獻出至少兩票，咁樣就真係中英友好、永世永續，咁樣習大大去倫敦，又有超級大款待，哈哈！大國政治，香港青年，都瞓街三個半月，依家明白晒啦！