中傳動生產及銷售風電等齒輪設備。圖為其網站。
「兩件一周」1月尾主打中國風電(182)，到上星期五，最高升咗22%。食住阿爺堅執環保國策，同鐵路投資，整多件平靚正筍嘢中國高速傳動(658)。
中傳動主打包括風電同機車等齒輪設備產銷，而當中產銷機車牽引齒輪，亦都攞到中鐵檢驗認證中心認證，係中國鐵路總公司合格供應商行列。祖國行家中，係領導性級數，兼有技術優勢。
啱過去上星期，國務院總理李克強，喺2015年政府工作報告講明，要大力發展包括風電環保行業，又今年鐵路投資，會繼續keep喺8,000億人仔水平。睇到係，阿爺全力推動環保同鐵路基建，中傳動主打瓣數，食到應一應。
喺上年上半年成績單turnaround(由2013年同期蝕2.9億元人仔，大幅虧轉盈2.3億元人仔)基礎下，中傳動嚟緊日子，keep住大翻身。場內專業評估，中傳動嚟緊2014年成績單，每股盈利(EPS)0.41港銀，到咗今年，EPS再增長20%，到0.49港銀，現價(5.14元)預測市盈率(PE)，得10.5倍，比行家折讓咗30%。中傳動家陣市帳率(PB)得0.8倍，包括祖國近磅行家嘅PB，喺1倍樓上，講PB，中傳動一樣吸引。
呢轉買中傳動，博嚟緊派發2014年成績單有盈喜，中線煲國策支持下，業績再下一城，當翻半番到8.5元計，預測16倍PE，啱先追到同業水位。
作者為中細價股專家
ADVERTISEMENT
