做人千祈唔可以亂咁講嘢，做評論的尤其要小心。寫評論，我的自我期許係依據事實。有事實，有根有據，做足基本功夫去評論，咁樣做先對得住自己良心，至少夜晚瞓得著。而且，按此發表之意見，對得住讀者及報館，因為希望讀者睇完有參考價值。有讀者支持，報館內各位大姐大哥就好放心，就會繼續畀稿費寫落去。做好事實再評論，點睇都係三贏。
所以，我寫評論，一定唔會去到最盡，有時甚至好學究，因為我覺得唔應該亂鬧而 是要按事實而作出批評。但點都好，最緊要都係要信自己的驗證及核實。本欄有時寫的東西，部分好明顯係從街外聽番來的東西，部分更是分析性，但寫到依家，樣樣都好小心，聽番來的東西，更加要問多方人士核證，唔好累自己欄目信任度下跌，更有機會累報館面對誹謗訴訟威脅嘛！
由於係咁，對自己寫的東西，爆出來的東西，要有把握，寧多番核實而不吹水。So far，我唔係寫文學創作，有信心唔係人云亦云。所以，評論可以好辛辣，但唔可以脫離事實，用臆測再靠估然後想當然地將一些人和事套落去。依家互聯網發達，以訛傳訛容易出現歪理當真理，呢一點每個寫評論嘅人，無論左中右都會明白，係未？
問題係，當大家見到一些古靈精怪的事情時，好容易會好好快地下結論，結果就會出事。舉例，早前政府交咗個民情報告畀北京，有啲議員話，如果北京順應民情報告之意見，就可以借勢發表正面回應釋出善意，然後泛民亦立即回以善意，結果大家可以響政改討論方面走前一步。
呢啲分析，聽落好似好insider，好有道理，但是係未準確，大家用時間去等等，就會睇到。去到今時今日，大家都看到，政府民情報告，原來真係吹水嘢。呢啲議員嘅所謂分析，結果冇發生到。但係，咁唔通議員會走出來講，sorry, 分析錯咗，睇錯咗。你會鬧，睇錯？唔係嘛！你班議員呃我！其實，如果議員們靠呢啲山埃分析而取得鎂光燈，想搶下曝光，咁大家就唔好太怪責佢地啦！
故此，面對外圍不穩定因素，而自己又硬著頭皮要評論之時，我傾向唔多亂講，亦唔會求其用乜嘢美帝在背後操控等阿爸係男人之理論，硬生生地套入香港政治發展的語境。我傾向，畀幾個可能，等讀者思考下。
例如泛民早前又搞聯署堅決否決831方案。大家會問，點解呢個時候搞呢？仲搞到飛哥唔肯來香港呢？大家可以從三個角度分析：
其一，泛民議員話，因為想響第二次諮詢之後聯署明志。大家信乎？若意志比金堅，使唔使又聯署呢？其二，係未有人想走數，於是激進人士用聯署方式夾爆佢，等佢嘅走數成本越谷越大呢？其三，又係未有政黨明知已經有幾條友走數，立即靈活變通，忽然激進，先夾後快，玩政治SM呢？
第二及第三點若果成立，即是已經確認，有人已走硬數，哈哈！咁大家就會明白，點解長毛會響記者會上落咒語鬧泛民同事，如果轉軚，不得好死，一生為奴啦！