自從屋企安裝咗互聯網電視盒之後，晚上定時定候就會睇英國電視新聞，現場直播。點解要咁緊張？因為英國五月就會大選了，政治角力去到白熱化階段。
依家嘅焦點，究竟係邊個黨贏。政治預測呢家嘢，我唔係專家，真正嘅專家係intrade.com。可惜呢間曾經畀紐約時報勁讚嘅政治預測期貨市場，因為畀美帝證監會狙擊，而最後迫到要收檔，所以我都冇辦法理解政治行情之數據走勢，於是唯有睇下英國幾檔賭博網站的賠率，同埋民調結果。
三月開始，已經有個C (學曹仁超先生之國語發音也)，即係勢，係保守黨會贏。民調見，佢地有大約三至四個巴仙左右領先。假如呢個C走下去，保守黨只要唔好犯大錯，佢地贏了國會大選之餘，仲有機會佔國會一半議席以上，趕走埋自由民主黨，咁就可以唔使下次又要同佢地搞聯合政府，回歸一黨執政，但係，佢地嘅攔路虎，唔係工黨，而係UKIP，英國本土派政黨獨立黨。
顧名思義，英國本土派嘛，即係趕絕移民，脫歐自保，英歐區隔，安全無憂。呢班本土派，定時定候會好紅，贏地方議席甚至歐洲議會之議席。佢地其實係挖咗唔少保守黨嘅支持者。英國本土派興起，對保守黨來講，係一個潛在威脅。一個不留神，就會連領先優勢也不保，令部分保守選民轉而投向UNIP就好弊。
呢樣就解釋咗，點解呢輪卡梅倫要唔要全部出席晒電視辯論。呢期英國媒體嘈得好緊要，因為英國幾間電子媒體，搞咗三場論壇，等卡梅倫同其他政黨響電視上互揪。電視辯論呢味嘢，響美國傳入，素來英國佬唔搞呢套。但自從上屆國會選舉搞開之後，今屆好似唔搞唔得，而且分開三場添，中間有一場，係卡梅倫同其他六大政黨舌戰，咁樣，其實真係幾好睇。
問題係，卡梅倫響晒口，話只會出席一次電視辯論，而且只會同六黨舌戰，其他一概say no，英國傳媒發晒火。單對單都唔敢，點解？全宇宙都知，卡梅倫上一次電視辯論好唔掂，輸咗，兼且連累埋選情。保守黨好嬲，所以今次都十五十六，如果要佢同七黨舌爭，真係輸埋，可能因此斷送江山矣。
為咗所謂「公平」，卡梅倫需要或者被迫要同幾個基本上唔會贏得大選的如綠黨、蘇格黨民族黨等一齊舌戰，一對六，唔見得公平。但點都好，唔出席電視辯論咁夠膽，真係好唔畀面，已經更有印象，卡梅倫係未有心避開，唔想影響選情呢？
民調顯示，卡梅倫話唔出席電視辯論的倒戈事件後，保守黨民調，無顯示佢地選情因為唔出席論壇而下跌，即係去又得，唔去又得。如此民調，加上最大反對派工黨黨魁文立彬，冇勇於一戰之必死意志。對手唔夠強，睇來卡梅倫都冇得輸了。