世紀建業市值約1.6億元。圖為其網站。
細市值或變身股炒到甩轆，世紀建業(079)，市值得1.6億銀，唔計創業板股仔，應該係場內其中一隻市值最細奀股仔。
世紀建業家陣1.59億元市值，扣除主要股東所揸近52%股權，街貨市值得7,600萬銀咁大把。而集團去到上年6月底，手頭現金2.65億銀，減去借款2.5億銀，仲係淨現金狀，財政又乾乾淨淨，絕對係有俾人斟嘅條件。
睇番世紀建業股價，由2007年以嚟，一路喺八年底部打橫行唔郁。又場內濠賭龍頭銀河娛樂(027)，08年金融海嘯期，股價跌到同世紀建業差無幾，而濠江賭業整固，銀娛亦由上年頭一路調整，到家陣累跌咗60%，但市值仍然講緊高達1,440億銀，係世紀建業900倍！
今年頭，世紀建業公布，掌舵曾昭武昆仲旗下Barsmark，轉讓世紀建業7%權益，俾佢哋媽咪司徒玉蓮，兩個party之前所發生問題，終告段落。後邊股東司徒玉蓮，叱吒濠江賭壇，而隨住股權轉讓，問題理順，大家又有無齊齊搞大世紀建業嘅合作機會？
咪扯咁遠，兼排除晒呢啲可能，世紀建業家陣市帳率(PB)得0.4倍，呢轉水向下流，狂炒細市值或有變身潛質股仔，冷灶煲一轉世紀建業，博有資金埋身，當翻1/4番到0.66元計數，世紀建業PB仲講緊有0.53倍，邊有耐炒過籠。
作者為中細價股專家