TCL通訊手機等銷售錄雙位數增長。(資料圖片)
TCL通訊(2618)唔止手機賣得好，集團正係申請緊第三方支付牌照，呢壇製作，既係市場熱炒賣點，而食住祖國電貿大趨勢，一搞掂，掂過碌蔗，但集團預測市盈率(PE)，仲講緊得6倍，平咗一大截。
TCL通訊上年盈利一枝箭增長2.5倍，到10.9億銀，承接住呢個強勢，今年1及2月，集團手機同其他產品銷售，分別按年增加10%同18%，好爆炸。專業統計，TCL通訊智能手機，已經可以躋身全球十大，講競爭力，實情彈出。
又場內專業評估，TCL通訊今年同明年每股盈利1.1元同1.23元，現價(8.02元)明年預測PE，得6.5倍，比起行家聯想(992)17倍、環球行家14倍水位，係平咗一半。
又今個月頭報載，TCL通訊正係申請緊第三方支付牌照，等緊人行批覆，一通過就開展業務，功能同支付寶無差別。睇到係，TCL通訊唔係獨沽一味，家陣開拓多條戰線，面向住龐大電貿市場，絕對係「升呢」。而市場家陣俾緊祖國龍頭之一嘅騰訊控股(700)預測PE，高達41倍，市值去到1.3萬億元，TCL通訊市值，講緊近100億銀左右，集團若順風順水，好肯定市場再秤鮮啲，市值身價，快高長大。
咪扯咁遠，呢轉煲TCL通訊，當翻一番到16蚊，明年預測PE先上到12倍，都仲未追到行家水位。
作者為中細價股專家
ADVERTISEMENT
