威華達去年純利大增2.6倍，圖為其網頁。
威華達(622)公布上年靚仔業績，股價翌日插咗8%，食住中港股市大茶飯，威華達銀彈又勁多，博佢投資回報增值肥仔肥肥仔。
威華達上年度張成績單，盈利一枝箭增長2.6倍，去到5.2億銀，盈利大增，主要係金融資產增值收益翻咗一番，去到6.3億銀。喺威華達上年資產度，金融資產亦相應增加咗1.1倍，到20.37億銀。呢個增幅，相信除咗因為新投放資金落呢啲投資度，威華達有眼光，受惠所購資產增值，亦係好大原因。
咁睇，威華達再對上一年，即係2013年尾，現金17億銀，齋長放銀行低息，老老實實，真係無乜作為，但上年風向一轉，投放金融資產，即時效應係，資產大升值。而上邊所講金融資產，等於威華達每股0.28元，已經超過威華達現價(0.225元)，潛在變現亦都好肥仔。
又呢筆資產，連埋威華達手頭現金11.57億銀計數，相當於每股0.44元，係集團現價近兩倍！
嚟緊日子，深港股市又快通，中港股市若然牛三，威華達仲有咁多銀彈優勢，食住呢潮大茶飯，仲唔肥過肥仔水？
呢轉買威華達，當上番上邊每股金融資產值，講緊要升23%，又威華達升94%，到0.44元，啱先上到每股金融資產連現金值，到時，集團市帳率(PB)仲係得0.73倍，呢個PB水位，應該仍然係券商行家中，數一數二至平之列。
作者為中細價股專家
ADVERTISEMENT
