Ubisoft旗下王牌遊戲《Assassin’s Creed》系列向來叫好叫座，全球fans無數，不過一手創作此系列嘅靚女製作人Jade Raymond自從上集《Assassin’s Creed Unity》後就離開咗Ubi，雖然土下座相信一間咁大嘅遊戲公司，唔會因為冇咗一個製作人而令全條產品線都有影響，但定時推出新作容易，係咪keep到水準先係重點。距離AC推出新一集相信仍然有好長時間，近日Ubi率先推出咗AC系列嘅新系列作品《Assassin’s Creed Chronicles：China》，講得咁「撩lung」，因為ACC原來都決定分成三部曲推出，包括中國明朝帝國、錫克帝國印度戰爭同俄羅斯紅色十月革命，各自講述三個唔同刺客嘅故事，先推出嘅首部曲就係以中國為背景，由女刺客少芸擔任主角，用嘅武器係飛刀、爆竹和中國劍，敵人講國語，亦會去埋澳門等亞洲地區，都幾有新鮮感。此外，ACC系列以2D橫向動作遊戲表達，玩落同細個玩過嗰隻《波斯王子》非常相似，考腦筋亦考操作技術。不過好玩還好玩，個人覺得AC系列已經去到覆水難收嘅地步，同一套方程式、冇乜驚喜嘅劇情，到底仲可以撐得住Ubi幾耐呢？