點解我老竇唔係大劉

自從劉鳴煒喺網台訪問時發表咗一番年青人買樓偉論後，即時俾人狂插，話佢自己含住金鎖易匙出世就講風涼話，再唔係就唔知世界艱難樓價勁貴，年青人搵萬五蚊，即使唔睇戲唔去旅行，都好難儲到首期買樓，劉鳴煒正一係晉惠帝，見啲窮人冇飯食，就問佢哋何不食肉之糜。

有人就話，點解我老竇唔係大劉？loser可以即刻答你，因為你冇人咁好命。所謂命，真係冇得解釋。亦因為咁，啲乜少物少點解咁信風水命理，就係佢都唔明，點解自己喺深水灣出世，而別人就喺天水圍，呢啲就係命喇，亦即係畢菲特話啲富二代係中咗子宮彩票，一出世就係大戶人家，唔使憂柴憂米。

點解唔喺深水灣出世

曾經識個上市公司高層，佢老闆係細仔，正牌二世祖，唔好話工作能力，淨識使錢，唔敗咗盤生意都偷笑。但因為佢出世後老竇間廠業務以幾何級數增長，老人家覺得呢個仔腳頭好，於是廢長立幼，將所有產業交咗俾佢，所以佢好信命，經常搵所謂嘅高人指點迷津。

老友話，老細耐不耐就搵嗰位高人返公司睇風水，公司一眾高層一收到風話高人會駕臨公司，即時人人自危，有醒目嘅就喺高人未嚟前，話有事要開會，然後拿拿臨走人，點解？老細咁迷信，倘若高人睇你唔順眼，話你唔利老細，咁你嘅下場就係咁喇，你話佢哋點唔避之則吉。

再講多少少，好多明星點解咁信啲怪力亂神嘅嘢，其實好簡單，佢哋根本冇辦法掌握到幾時可以紅，有人好靚仔，偏偏就紅唔起，有人樣衰衰，竟然可以大紅大紫。

不問倉天問鬼神

你話黎耀祥好演技咩，又唔多覺，成日只懂聲嘶力歇大喊大叫，樣貎平庸，過去唔係做古惑仔就係做敗家仔，竟然憑一套電視劇令佢爆紅。舒淇靚唔靚女，真係見仁見智，靚過佢大有人在，但佢竟然成功由脫星變花旦，仲紅咗咁多年，呢啲就叫觀眾緣。又有啲演員一直半紅不黑，衰足廿年，一個冇厘頭角色又可以突然走紅，所以你話點解娛樂中人咁信玄學，因為你對自己嘅前途無法掌握，只好不問倉天問鬼神。

世上有啲人其實可以估算到自己會點，例如你好努力讀書，就有機會做到專業人士，由基層跳到中產階梯，佢哋自然多信自己少信鬼神。