噚日講到，有北方大國之學生話，來香港度周末，好鄉土，好多同學都唔想去。我覺得，以香港的潮語理解，呢位上面大國之學生應該係覺得，香港老x土，有乜好去？去都去第二度啦！
我估好多香港朋友睇完呢啲comments，高興都嚟唔切，最好佢地唔好再嚟。因為自從上面高調公布，以後隔籬地市嘅居民，日後只可以一周一行之後，似乎香港朋友心情舒暢番，啖氣都冇咁谷，有人仲覺得好似行街舒服咗添。老實講，數字會說話。上面嘅人係咪嚟少咗香港呢？咁又唔係噃，四月上面來港之數字，冇跌到噃，照道理，主要購物地點嘅人流唔會因為咁樣少咗。
上面的同學仔覺得來香港玩好鄉土，照道理，香港人應該有一種危機感，要覺得係咪香港吸引力唔夠，需要作多方面改善，以迎合佢地之旅遊口味，咁又未必。我總覺得，一個地方的魅力，唔係靠整幾個主題公園，抑或搞幾個新景點，又或者搞購物天堂至得。而係，一個地方要長期走落去，靠食四方飯搵食，就要吸引唔同人，基於唔同理由來香港玩、交流、做嘢，搵錢甚至係hea來hea去總之唔願走。
多年嚟，總有同事朋友離開香港去英國讀書。我通常都會話，你地去到倫敦(唔係埠仔，sorry)讀書生活，到最後都唔願意走。通常講完之後，十個有九個真係點都要依依不捨，去到最後一刻至走。好多時嘅理由，就係佢地響嗰度，無論興趣係乜嘢，總會響嗰度搵到一個位，可以好好地舒展自己所長，好happy地同人互動，好熱切地去推動自己理想，又唔知點解總會有同路人同組織齊齊上，仲要係有唔同族群坐埋一齊搞搞震，呢樣嘢，香港真係好難做到。
換言之，一個vibrant的城市，就係要accommodate到不同之文化，做到多元化，而唔係一味迎合某一個地區及族群的旅遊文化，最終其他人就會嫌棄香港，因為太鄉土。老實講，假如北方大國來香港都係見來見去嗰啲嘢，大家要嫌悶啦。維港夜景靚？珠江兩岸都唔差啫！香港購物天堂？唔係嘛，響淘寶年代，買嘢真係好多選擇噃。香港文化唔夠多元，國際性唔夠，華人以外地區願意來港做嘢搵食嘅人多，但純粹因為香港文化多樣而來香港嘅人唔夠多，變咗嗰種思想交流嘅力度唔夠強，所以，香港唔可以只有一種大國文化，而應該有多種文化，咁至可以有前途。所以，趁人地覺得香港太過鄉土之時，我地就好應該趁機，韜光養晦，搞好自身的軟實力，更國際化，北進係出路之一，但南向，東進，西闖都係出路。咁樣，當上面強國人覺得香港仲係好鄉土之時，我地已經暗渡陳倉，走自己嘅文化自主路。
唔容易㗎，不過總好過為咗迫自己唔夠鄉土，猛咁迎合某類客源而走單邊主義，係咪？要做到命運自主，先要有文化自主，係咪？