過去成日聽人講，投資之道係要獨立思考，唔好跟從群眾隨波逐流，要人棄我取，人取我棄，咁先賺到大錢。
跟住啲專家就會舉好多例子，例如97年喺股市炒到火熱時離場，同年將啲樓賣出，又或03年沙士人人害怕，你就走去買股買樓，又好似2008年金融海嘯前，肯逆市而退等，都可以贏開巷或規避沒頂之災，以上呢啲例子全部可以引證到跟群眾對著幹先係硬道理。
遠離群眾隨時輸死
驟耳聽落去好似好有說服力，但金融Loser喺股市打滾廿年，所謂遠離群眾獨立思考，喺當時跟本好難做得到，甚至係冇乜機會可以捉得到，即使做到，百分之九十五都係好彩。我想請問啲專家，你幾時知道係最瘋狂，幾時知道係見底，好多都係事後諗返先覺得係喎，特別你真係參與其中，成手股票或現金時，恐懼與貪焚喺你腦海交戰，更加係十五十六，無從抉擇。
就好似樓市咁，兩年前大家都話好高，點知沒有最高，只有更高，早前股市何嘗唔係，你話一隻平保兩個月內由五十幾銀升到近九十蚊，升幅超過5成，照理應該抖抖，點知佢又繼續喪升，上個禮拜報一百一十幾，你話要遠離群眾，但幾時先遠離，真係無從捉摸。
反之跟群眾一起，贏嘅機會更高，你睇睇每一個泡沫，係要經過一兩年時間先會爆破，呢段時間若然跟紅頂白，人地炒乜你炒乜，贏面明顯高好多，事關炒股根本係一門心理學，當大家都咁諗時，市場會喺大部份時間朝呢個方向走，若然逆其道而行，隨時輸死都未等到真正轉勢。
次次話爆實中一次
當然，呢啲泡沫最終會爆破，但問題就喺呢度，你點知道泡沫幾時爆，過去咁多個泡沫，真係有幾多人知道佢幾時爆破，若然有人猜中，睇怕都係彩數居多，又或佢跟本冇真金白銀去投資，所以咪成日喺度話爆囉。
再唔係就喺泡沫過程中，講咗一次話遲早爆，但唔爆喎，於是冇耐佢又講，又唔爆喎，於是佢又話泡沫，如是者講咗好多次，終於個市爆喇，佢就打鑼打鼓話自己準，但喺成個過程中，錯咗好多次。大家睇睇之前個摩根士丹利有位前策略員叫謝國忠，成日睇淡個市，結果錯了又錯，當然，個市最後都如佢所講爆破，但呢啲單一方向估算係冇價值，唔通一早就停晒手唔做嘢咩，又或信佢老哥個方向，於是走去沽空，最後俾人夾死都未等到市冧呀！
ADVERTISEMENT
