有人力資源管理顧問機構發表「生活費用調查」報告，香港首次躋身全球十五強，亞太區則排第四，厲害過日本。去年，香港的物價比東京低11%，今年反超前4%。
香港的消費，愈來愈貴。去年全港家庭入息中位數，只有$23,500，一頓外出晚膳，卻動輒人均二、三百元，點捱？茶餐廳流水作業的是日午餐，六、七十元落樓，好等閒。想久坐一點，上百元是最低消費。要有返工無放工的香港人，天天買餸煮飯帶飯，又太苛求了吧？
有自由人行家笑言，我們都是過着早餐當午餐，下午茶當晚餐的日子。於是，我問，$20以下的茶餐，抵食，好味，無人，任坐，有麼？友人說，連鎖快餐店都沒有。最行貨的茶餐，也迫近$30。
我說，就是有。你會問，邊區先？講都唔信，是人流如鯽的有錢人區──尖沙咀。各式醬多只賣$16；三文治或芝士餅$24；香口小吃如魚柳薯條、雞翼／雞髀薯條、迷你芝士牛肉漢堡薯條等等$26，飽肚的意粉餐$36，統統大大碟，配飲品，加$25還再送一大杯啤酒。以今時今日的香港，都算是跳樓價了。
味道如何？不算驚喜，但至少即叫即炸，上桌一陣滾燙的熱氣，不像連鎖快餐的掟死狗。環境寬敞，勝在無人。燈光暗，不宜看書或工作，三五知己東拉西扯，卻分外有氣氛，夠輕鬆夠放。平日黃昏歡樂時光還可以包房，最多廿五人，可以唱Ｋ，最低消費合共不用$800元，涼冷氣都抵。
不過，我想不出，誰能來？中學生未夠秤喝酒。附近的上班一族又未放工。大學生？抑或留待我等無業遊民，hea下、攤抖一下，吹下水，度下橋。地址？尖沙咀赫德道6號，JC Café&Bar。
《港孩》作者。從AO到Freelancer，不愛搵食，只愛找吃。
ADVERTISEMENT
