買股最忌係買到昨天的股王，呢啲股票老散最易中招，皆因啲阿叔阿毛見過隻股票好高價，到股價不斷回落時，唔少人就覺得抵買，點知愈買愈低，到最後梗係被綁，好彩等十年八年翻身，黑仔的話就永遠都見唔到家鄉。
大家睇睇思捷(0330)同電盈(0008)就係最佳例子，思捷由過百跌到七個零，回落時幾乎每個位買都要輸，電盈更加不濟，十幾年下來都未能返家鄉，睇怕以後都返唔到科網高位。
高增長故事玩完
講咗咁多，查實係想提提另一隻散戶至愛的領匯，呢隻Reit喺05年上市，當年每股十個八，今天單就價格已經升咗三倍幾，都未計每年勁派現金。於是乎啲人就覺得，買領匯財息兼收係理所當然，點知今年分派只係增長9%，係首次低過雙位數，睇嚟領匯高增長故事已經玩完喇！
最近領匯頻頻進行收購，先喺香港買入現崇山商場，之後又老遠跑到北京，花廿五億人仔買入北京歐美匯購物中心，之前更跟南豐聯手，斥資五十八億六千萬買觀塘地皮轉做發展商，驟眼睇好似好積極，睇真啲係黔驢技窮，冇賣點下搵啲新搞作，希望有啲投資亮點去留住班基金佬。
收息低過內銀同匯豐
點解領匯搞咗咁多動作？只要大家睇睇領匯個回報，大概心裡有數。按上周五領匯收報四十八個二計，回報唔夠三厘八，比起市場其它Reits隨手都有五到七厘，真係好遜色。
再睇睇，銀行股好似匯豐(0005)、中銀(3988)、建行(939)、工行(1398)，通通都有五厘到近六厘，況且喺阿爺放寬銀根下，內銀股價隨時可更進一步，比起領匯吸引得多。
舊年領匯商場租金增長只有百分之六點九，明顯出現放緩。若大家再睇睇香港現時商舖租金，更加戥領匯股東擔心，自由行消費到頂，未來商舖租金唔好講話升，唔跌已經偷笑，你領匯大部份收入來自屋邨商場租金，雖則話唔似啲貴價商品咁首當其衝，但喺呢個大環境下，肯定難以獨善其身。
加上領匯過去推行啲「資產提升計劃」（即係翻新商場重整租戶策略），基本上有潛力嘅商場都做晒，剩低啲商場不但面積細，位置亦差勁，可發揮空間十分有限，我就睇唔到仲有動力去推升租金，怕且未來三厘幾息都唔知保唔保得住。
大陸商場係英雄塚
好明顯領匯高層都察覺到問題，佢哋心知租金收入已經到頂，於是諗啲新橋入去，免得啲基金掟貨。不過大家唔好忘記，現時樓價咁高，你領匯突然學人起樓做發展商，喺咁高樓價仆個頭埋去，樓市有乜風吹草動，隨時要蝕本。
至於話拓展中國市場，Loser一啲都唔樂觀，經營內地商場簡直暗藏危機，內地商戶有幾野蠻得野蠻，生意有乜風吹草動，隨時會唔交租，有時喺租金分成上，又有好多古惑招。況且佢哋啲經營意識好自私，將物件隨意擺放，又唔注重衛生，商場殘得特別快。再講，現時喺內地大型商場遍地開花，競爭激到你唔信，除咗某啲地點特佳之地外，其它商場未必咁易捱。
最重要係美國隨時會加息，市場踏入加息周期，靠收息啲產品就愈唔吸引，領匯收息只有三厘幾，若然加息步伐快，領匯必然受壓，喺咁多不利因素下，領匯隨時成為過氣股皇，總之就係嗰句，識揀嘅就肯定唔會揀領匯。