經營商場好講策略，唔少發展商都會喺商場搞吓優惠，即係消費咗幾多錢就會有著數，例如送啲禮物，又或有抽獎券咁，目的不外乎鼓勵啲人購物。一般嚟講，消費幾百至幾千，就會有消費優惠，但有次Loser經過尖沙嘴1881，睇見佢嘅優惠就目定口呆，因為冇乜幾多人可以享用得到。
先講有乜著數，就係漙儀眼鏡優惠券五千銀，驟眼睇都幾闊綽，一啲都唔失禮呀！但睇真啲你會懷疑，究竟有幾多人可以享用得到，皆因你嘅消費額要達到一百五十萬，然後先可以攞到張優惠券。喂！有幾多人行商場可以買到百五萬，呢個金額可以買部Benz，甚至可以喺啲二線大陸城市買到成層樓喇。
當然，呢個商場針對大陸客，入面啲舖全部名牌，更加有唔少鐘錶珠寶店，但我懷疑呢啲優惠對推廣有乜作用，買得起百五萬嘢嘅人，又點會志在區區幾千銀優惠？
不過咁，若果你消費唔起百五萬都冇要緊，商場體貼入微，照顧周到，只要買夠五十萬，都會送你一個眼鏡盒架。
成報玩死陳國強
最近老牌報章《新報》因為連年虧損要停刊，話就話停刊，實則係執笠。呢頭《新報》玩完，點知唔夠幾日《成報》就話要清盤，就連《壹周刊》都話要裁員或整合，睇見呢幾則新聞都幾令人心傷，事關印刷媒體似乎走到盡頭，敵唔過世界洪流要被淘汰。
講起《成報》，幾乎搵邊個財團入股都搞唔掂，正正係印刷媒體中嘅亞洲電視。喺十幾年前《成報》賣盤，殼王陳國強以一億六千萬買入，殼王過去戰績彪炳，記憶中從未輸過，以佢無寶不落嘅眼光，以為呢次《成報》應大有作為。
點知搞咗幾年，蝕咗殼王幾億嘢，份報紙一啲起色都冇，殼王焗住壯士斷臂，賣咗俾星美老闆覃輝，即係北京天上人間個老細。經此一役後，殼王背後同人講，話到明呢世都唔會搞報紙，提起都怕怕，正所謂輸錢事小，冇面事大嘛！
希臘贏咗面子輸咗國家
希臘終於可以暫時留番喺歐元區，總理齊普拉斯做咗咁多政治騒後，都要面對現實，屈服喺歐元區國家下，應承要節流加稅，又要將國有資產出售。
個幾禮拜前希臘長毛仲好威風咁喺電視前話要捍衛希臘人尊嚴，喺公投反對派勝利後，又好英咁話民主勝利，最後咪又要死狗咁接受歐元區國家條款，仲要承擔更嚴重後果。希臘俾佢拖咗一拖，金融體系受到大震盪，結果要借更多錢去救國，原先五百幾億歐羅搞掂，現時要借多到八百幾億，孭債更重。
唔單止咁，希臘國際形像蕩然無存，借錢唔還，俾人覺得你冇品賴賬，人民又懶惰，仲好自私唔肯犧牲；銀行體系又危危乎，打後外國投資者肯定唔再信你，呢次全國付出代價太大，正係贏咗面子輸咗個國家。