政府蝦職訓局！

職訓局主席陳鎮仁(右3)與執行幹事尤曾嘉麗(左3)，和同事及在酒店實習的學生(左2及右2)合照。

職業訓練局昨日喺VTC薄扶林大樓訓練酒店T Hotel設午宴，邀請傳媒見面交流對本港職業專才教育嘅睇法。職訓局主席陳鎮仁話，為咗令VTC接通專才之路，佢哋都好努力爭取資源，可能因為佢好著緊見親人都提住，於是不時被人話佢唔好成日講錢得唔得？點知陳主席一講起就有啲傷感，突然坦白講：「政府蝦我哋(職訓局)！」何出此言？佢話依家VTC平均每名學生分配校舍面積及不上千禧學校嘅學生，「千禧學校平均每名學生佔7平方米，但我哋平均每名full time學生只佔3至4平方米，最叻嗰間都係平均每人佔6平方米。」講講吓，佢仲話「VTC所得的資助只有大學的三分之一」Ray都覺得係厚此薄彼！講到解決校舍土地問題，都見到啲曙光，皆因今年《施政報告》承諾預留一幅土地俾職訓局重置現有舊校舍。陳主席透露，計劃用鄰近長沙灣港鐵站嘅香港專業教育學院(黃克競)嚟交換，並要求政府必須以市區地交換，因為佢哋嘅學生大部分來自基層，唔應該加重學生交通費負擔。政府有無話喺邊度？陳主席口密話未知。不過，執行幹事尤曾家麗就漏少少口風，話應該喺番九龍區。

Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。