1.上到車，話你叻！每日返工放工，都好似參與《歡樂滿東華》。
2.扶手柱先天錯誤的設計，不論是車廂的位置，或是未更新為欖形三叉款式，都叫乘客無奈被堆於門口。
3.最早期的地鐵「修正早期系統」中，鑽石山站興建時，已經預留兩側之月台基座結構，作為日後東九龍站擴建之用，不過最後還是荒廢。
4.、5.同東九龍站一樣，被預留興建的還有林士站大堂及月台，亦因計劃擱置而併入上環站範圍內。
「地下鐵碰著她，好比心中女神進入夢；地下鐵再遇她，沉默對望車廂中；地下鐵邂逅她，車廂中的唱談最受用。地下鐵裡面每日相見，愉快心裡送……」這首每日《幾分鐘的約會》，完全美化了每日返工放工的地下深道行，莫講話可以有空間去唱談，就算俾你望一眼，那種壓迫神情實在難以歡顏。遇到女神，甚至乎遇到發哥，你都會想改改歌詞，變為「地下鐵裡面每日相貼，願快身可鬆」。
外來客增負荷
就算唔係繁忙時間，但因為大量遊客，每一卡車廂，都總有幾個拖喼，冇被撞親或者轆到腳，就真係避過一劫。所以歌詞創作人鄭國江先生真係有遠見，「碰」這一字多意，除了眼見碰面的意思，還有身體碰撞之意。市區地鐵(不喜歡叫港鐵)8卡車廂，與及火車(即前九鐵)「電氣化」後的12卡車廂長度，兩者同為英國Metro-Cammell Weymann(MCW)產品，雖然MCW出名耐用，但冇預計會用到接近40年咁盡，亦冇諗過香港800萬人口，還再加每年4千幾萬遊客乘搭。在火車官方鐵路貨運停辦後，更加冇預計民間會大量用來載運尿片丶奶粉和益力多。但諷刺的是，原來近年雖然減去大量座位，但每卡車廂只設有一個傷殘人士連同輪椅的乘坐位置，可見輪椅雙人行或者學生攜帶樂器返學，真係要搵水貨客幫忙至得。
漠視人顯自私
好在港人有縮骨功，就算車廂幾爆，每個站都可以塞多十幾個。此時此景，唔理係地盤佬或是OL，總之上得車，就唔好咁多嗲，不過大家記得掩住口鼻，唔好喺人頸上噴氣。講開上車，當然要排隊，地鐵就排兩邊，火車則中間三線，而九龍塘又有新的全部靠右，單係排隊已經一鐵多制，加上有人藉此乘機打尖，未上車都已經頭暈閉翳。上車唔易落車更難，門口正中位置先天錯誤設有一扶手柱，乘客一入車廂被迫自然埋堆，你想行入啲就真係攞嚟攝。加上每個站總有啲人闊佬懶理，等人哋入晒佢先至動身落車，好有性格咁逆流而行。亦有人總係入閘之前才摷八達通，或者不斷在感應器上作手袋「打磨」，要知道近日有好幾個站於0830前可優惠出閘，咁做真係阻人發達。
遲落車，阻出閘都係秒閃，但係玩遊戲嘅時候唔該靜音，你企我坐，咁啱你部電話後置speaker，所有音效直入我耳中成為噪音。其實每一部智能手機都有耳筒附送，又何必要迫我知你點過關。好啦，打機都算，又何必要做自私「柱男」，以一個人的背脊力量去獨霸整條扶手柱，可知其老土設計停留於三、四十年前，當世界各地的大眾運輸採用欖形三叉款式，佢哋寧願增加大堂店舖出租，都唔去小改變作大改善。
賺到盡下轉上轉
話就話「搭地下鐵路，話咁快就到」，但繁忙時間由港島去九龍，真係要轉車喺金鐘。金鐘出車上一層過對面轉去中環，之後再經金鐘才去到九龍，都唔明點解成千億去起一條載客量不高的高鐵，都唔發展多一條港島副線。其實大部分支線興建時都有全盤計劃，亦有「預留結構」作日後發展，但係等下拖下，只變成荒廢的技術裝置，曾懷疑當中是否有政治考慮和利益輸送。要知道香港鐵路為何方便，其實重點就是車站與目的地之間的最後一里路，不但接通商場旺點，還有巴士、小巴作接駁配套，亦有傳因為傾唔掂數，所以最後西鐵站沒有「廣東道」。
講開鐵路，最近有一則發生於大堂的新聞，相信絕大部分市民不會接受新聞從業員製造新聞之餘，跟蹤並用粗言穢語、以暴力襲擊追訪，繼而裝扮成受害人，挑釁之餘，邊打邊砌生豬肉，顛倒是非賊喊捉賊。打完人，跟住再抹黑人，先是個人 士犯法，繼而是集團式鼓吹包庇，猶如停留於文革時期。又是否警察涉及刑事打錯人，都可以公帑賠錢了事。搵食搭車要用洪荒之力，保守公義也要有良知！
興趣多而尋究底，愛藏物並擁思人。七十後，舊情尋。電郵：[email protected]
ADVERTISEMENT
