政府啱啱公布零售業總銷貨價值，臨時估計數字又跌，即係連跌咗18個月，跟住十一黃金周，又話內地團大跌三成，咁嘅境況，商戶都係要繼續諗計谷消費，有商家就開始睇重本地客嘅消費力量。Ray噚日收到新地公布旗下十大商場過去兩日小黃金周嘅人流與銷情數字，兩者按年比較都有升幅喎，新地就認為銷情平穩嘞！
新鴻基地產代理租務部總經理鍾秀蓮話，今年本港嘅零售市道充滿挑戰，上半年集中推廣本地消費後，下半年都對市況保持審慎樂觀嘅態度，所以仍著重刺激本地消費嘅方針。佢哋嘅策略似乎奏效噃，咁啱近日天氣轉涼，市民換季帶動消費意欲，加上PopWalk天晉匯喺9月份加入，所以過去兩日旗下十大商場共吸引咗213.5萬人流，按年升10%；營業額達1.36億元，按年升約8%。
鍾秀蓮仲話，為咗進一步刺激消費，會再喺集團旗下其中五大商場：wtc more世貿中心、將軍澳東港城、上水廣場、Mikiki及PopWalk天晉匯，喺10月重點推出「至TOP消費獎賞」，預備咗十多份總值逾12萬嘅潮禮俾每個商場最高消費嘅頭三名顧客，以吸引更多本地客消費，希望令10月成為消費黃金月。
Ray~投身傳媒工作多年，由市場研究做起，一直與公關、廣告、新聞界結下不解緣，心境永遠青春。
