曾幾何時，game友手執一部PSP加一隻「芒亨」(Monster Hunter)，攻陷全港18區大小M記，而近期成為港聞報道、集體回憶嘅觀塘裕民坊M記，更加係九龍東同堆填區game友聚腳地之一。時移世易，芒亨新作《Monster Hunter XX》即將在周六推出，雖然今時今日芒亨已經引發唔到社會現象咁誇張，但忠實fans一樣極多，土下座當然都係其中一分子，畢竟4人共鬥惡龍魔物嘅玩法係由芒亨開始，同戰友齊心協力諗計打贏又識噴火又識飛天嘅巨龍，往往唔係幾分鐘就可以完成，既有挑戰性亦講求合作，相當好玩。講番新作MHXX，今集繼續3DS獨佔，以MHX為基礎再強化，加入G級任務同可以限界突破嘅裝備，當然唔少得新魔物登場。總之一切都係熟口熟面，亦相信玩嘅會繼續玩，但要吸引新玩家，似乎就要等Capcom轉換平台先做到，講真3DS都真係太舊，如果新作可以喺近期最爆嘅任天堂Switch推出，先會引發到新一輪芒亨熱潮！
ADVERTISEMENT
送健之堂舒壓好眠足湯 x 石墨烯足浴袋
