唔知大家有無留意，政府又好義工團體又好，成日講滅鼠滅蟲滅蚊滅蟻，從來無人提過滅曱甴。係呀滅蟲公司係會印埋曱甴個樣喺佢地可覆蓋範圍，但曱甴對好多香港人嚟講唔係需要應付嘅其一，而係唯一。
立法會區議會選舉，從來無一個準議員將「減甴患」放落政崗。可惜我又唔打算參選，所以面對每個曱甴來臨嘅春夏季，除咗坐以待斃，我真係咩都做唔到。
以前同父母住，有咩可以嗌救命。搬出嚟住之後，以為預防措施做足晒，但如果你熟曱甴，你會明白其實佢出現真係防不勝防。依家我住離島老家在沙田，兩老成七十歲人，真係有曱甴，我都唔好意思半夜打去求救。咁可以點？我已經諗到：
設計一個街坊app，定名「止甲由」(很多人見到曱甴兩個字都毛管戙，以甲由代之，字形上仲有埋插死你嘅狠)，一個鄰里互助網絡，為似我一樣驚曱甴驚到標尿嘅受害者配對家住附近嘅曱甴殲滅英雄，每次五百，不成功不收費。
我好相信，供求都有龐大市場。驚曱甴嘅人多多錢都肯畀，但對唔驚嘅人嚟講殺一隻收幾嚿真係好執到喊。多會員就有廣告收入，一有錢我哋就可以成立地區曱甴敢死隊，分區做社區滅甴，目標係將香港變成另一個北海道，一個無曱甴嘅城市！