當連伊朗都會有恐襲的時候，大家就唔好以為，我地嗰位就快下台嘅香江領袖，講講吓恐襲，大家就覺得佢講笑。題外話，有時候狼來了的故事，響現實世界時有發生。當一個領袖畀人感覺係不斷講語言偽術去呃神騙鬼，依家仲邊會有人信佢講嘢呢—唔好對號入座，我講緊陳水扁。佢依家保外就醫，但就四圍去出席活動，你仲信佢真係有病？佢依家話真係有病，一定要響外面求醫，唔可以入去監獄服刑，你仲信唔信？
大家有冇留意一件事，就係香江的恐襲風險。呢三年，政府話香港都係中度風險。對比風險最高嗰啲西方國家，香江同其他好多國家一樣，都係中度風險。但就唔代表唔會發生。伊朗呢單嘢有乜嘢啟示呢？睇番報道，其實有啲真專家的分析相當到位。有個專家話，用教派分析的框架，即係什葉vs遜尼之對立，來理解伊斯蘭國vs伊朗，當然係講得通。
但係，仲有一樣嘢係大家忽略的，係伊期蘭國之陣地，特別係響伊拉克同埋敘利亞陷於苦戰，唔係好掂。佢地極需要搞一輪大攻勢，證明自己實力及激勵士氣。至於點解要打伊朗，就係因為以前講得太多要搞伊朗，講到爛。外界都覺得，伊斯蘭國嘅恐怖分子有冇能力去伊朗做嘢呀，講咗咁多年得把口云云。依家佢地就要做畀你睇，等你地知道伊斯蘭國唔係鬧著玩的。
呢個專家的分析聽落都幾合理。不過，咁又關我地香江人乜嘢事？梗有啲嘢。首先，佢地呢班恐怖組織，唔好當佢地吹水，以為佢地文宣方面只係識得齋拍片去做下網絡宣傳，嗰啲針對某些國家的宣傳片都係吹水，識吹水唔識做嘢，搞到大家冇晒防備。於是，就大家當佢無料到嗰陣。佢地就偷偷部署做嘢。
其次，如果大家有留意過佢地文宣上，曾經講過會針對嘅國家，都開始應驗。例如東南亞國家，大家都估到邊幾個，亦都知道菲律賓嗰邊仲打緊反恐戰。但有啲國家好似仲未見有大件事發生。邊啲強國唔好講啦，總之一定要醒醒定定，小心為上。
咁樣講咗咁耐，香江其實表面上好平靜，其實咁平靜之地方，正係人地恐怖組織最想做嘢之地方。我純粹靠估。香江地方，除咗六七暴動咁大件事之後，真係冇試過有大型恐襲。咁對於恐怖組織嚟講，衝擊亞洲多個國家之安全，宣傳效果一定最好。而且，依家人人暫時係冇防避，無論商民，落街買嘢，都唔會想到，有人幫襯你買二手手機，其實係用嚟製造某一些特定之裝置。咁響大家冇防避之下，呢班恐怖分子就會開始響屋企或者其他地方製造特定裝置，響收到柯打之後，即刻出動，視死如歸。
咁香江係未安全？我真係唔識答，但凡事都要有防備至得。係未？