C眼

經常去大陸工作嘅人，能夠生存，除咗有A眼同B眼，一般仲有隻C眼。C眼唔係屁股後面嗰個，而係專門睇古靈精怪嘢嘅眼。一般香港人冇C眼的原因，係因為太耐冇用這個功能，慢慢退化咗。就好似人類以前嘅腳板生得好似手板一樣，方便爬樹，後來慢慢生活城市化之後就唔使呢個功能，自然慢慢腳板都退化咗。

C眼睇嘅古靈精怪嘢分兩種，一種係攞着數嘢；另一種係睇人嘅蠱惑嘢。先講第一種睇攞着數嘢嘅功能。

中國人係非常之懂得「走精面」的，長年累月嘅訓練之下，亦都慢慢形成超強嘅攞着數功能。因此，喺大陸做生意一定要識得防止客人喺你身上攞着數攞到窮。就講一個案例，就係我有一個朋友在大陸做餐飲業生意的，佢長年都有三個客人包咗佢間20人大房，但係每餐只係花一兩百蚊，搞到佢好煩惱。你會諗，設個最低消費咪得囉。但係國內有一個部門叫「物價局」，基本上所有直接間接影響生活嘅消費都會管理。物價局係唔允許餐廳房間設最低消費的，否則叫「強買強賣」，可以罰款。除此以外，香港我哋非常之興奮聽到嘅 free corkage，全大陸都有。因為又係物價局唔允許餐廳強收人開瓶費，餐廳可以唔俾人自帶飲品，但係唔俾收人開瓶費。同樣，如果你自己帶隻烏龜去餐廳俾人加工，餐廳係唔可以收你加工費的。所以返大陸，必須要加強C眼嘅功能，做生意或者工作先會少啲預挫敗嘅機會。

C眼嘅另一個功能就係睇蠱惑嘢。因為以前嘅中國社會法治不及現在完善，所以好多人都敢鋌而走險。比如說你同一個人做生意，佢欠你10萬，但係佢成副身家只有自己層樓，層樓價值100萬。你走去告佢，即使法官判你贏，法院都唔會執行拍賣間屋來還你的錢。國內不明文規定，如果要強行執行拍賣一個

人嘅屋企，必須欠款達到間屋嘅一半先得。所以好多人都可以一屁股債人家都拿他沒辦法。所以要喺大陸生活的人，一般隻C眼都好強睇人家的蠱惑嘢，比如說做 Deal 除咗睇合同文字以外，更需要睇對方是否蠱惑仔。

但係我睇呢隻C眼的功能會慢慢減退，因為法治同制度越嚟越完善。上面剛剛講到的法院不執行的情況，將會如何得到解決？大陸依家成立咗一個叫「個人征信系統」嘅嘢，不斷記錄你個人嘅 Credit 情況。比如說以前你輸咗場官司，可能全世界都拿你沒辦法。但係今日嘅中國會將你嘅「個人征信」列入黑名單，入咗黑名單就不能夠坐火車、坐高鐵、坐飛機等。除此之外，冇銀行會借錢俾你，按揭貸款都做唔到，總之就四方八面咁影響黑名單人士嘅生活。呢個系統令到社會上的呃呃氹氹嘢少咗好多，所以包括我在內的很多人都非常歡迎呢個政策嘅推行。