執筆時，距離《Monster Hunter World》正式發售仲有1日，土下座作為業內人，當然已經留到部人人都搶，一早爆訂單嘅特別版PS4 Pro主機啦！問過今次遊戲嘅亞洲代理，佢哋話今次隻game受歡迎程度連日本Capcom都嚇咗一跳，本來打算針對外國市場大改以往風格，仲諗住中港台日呢啲亞洲玩家會有流失，點知偏偏相反，吸咗好多舊雨新知，估計賣過百萬隻走唔甩。咁大需求，首批貨量都未必應付到，土下座建議未訂game嘅朋友考慮下載版。講到呢度未入正題，但短短幾句講完，執筆時，已經見到外國流出咗正式版畫面，換句話講外國已經偷跑，雖然未必玩到online連線，但早成3日單機解任務都咪話唔著數，唔知會點收科呢？
