老友A曾經說過，有一種病，叫做選舉病。病徵就係，有理冇理，只要有選舉，就會有身影。
咁我又唔覺得係一種病。應該話，想選舉的人士，都有好多種。有些係真心從政，真心希望參與政事的，無論係有冇政治力都好，佢地係屢敗屢戰，咁大家都應該尊敬佢嘅，因為選舉唔係講玩，係要意志同經費，你估講玩咩？
有一些係想借選舉揚名。係呀，選舉之奧妙，在於每次電視電台，點都要畀airtime你，講你的政見。假設你想出名，你想短時間內，響全港各處見到你的名字，最好就係選舉。畀低保證金之後，你就可以去參選，跟手周街都係你的名字，仲可以上電視，簡直係抵過去CCTVB落廣告。
不過無論點都好，有選未為輸。好多人仲用緊老皇曆，覺得要發展政黨，最好就係去選舉，特別是立法會。用立法會選舉爭取公共空間及資源，跟手推動政黨發展，相輔相成。咁樣係民主派組織常用之招數，而且係最短時間發展組織的方法。因為咁樣，新政治團體就係用呢招，希望可以學以前果啲民主派政黨，借立法會資源發展組織。
不過，自從有確認書之後，立法會選舉發生了變化。呢條路，越來越難，閂咗啦。
確認書的目的，係畀了權力政府(北大人)，劃咗一個範圍，等香江的政黨組織，響呢個圈裡面玩選舉。你要入呢個圈，你就要接受確認書的條件。咁樣，如果你唔接受嘅，連入都冇得入。咁邊個入呢？就由北大人決定。係咯，聽話有得選，唔聽話冇，就係咁簡單。
呢個係一個好大的遊戲轉變，所以依家所有新冒起的政團，或者想上位的政界朋友，就要留意呢個轉變。 依家唔可能好似以前咁樣，借一單社會事件，借此轉成政治議題，政治價值分歧，善惡之爭，跟手就在鎂光燈下出晒名，在媒體KOL吹捧下，變成咗香江救世主，跟手谷盡人氣去立法會，然後上位……呢一招唔work了。
既然唔work，咁樣有心從政之政界青年或者朋友，就要想下點樣去部署。有好多種方式嘅。例如真係好鍾意選舉，唔選舉唔鬆化嗰啲朋友，咪公開認錯轉變立場囉。佢地都可以選擇，如果自己冇乜牛脾氣，又覺得其實民主派old seafood都唔係眼中咁差嘅，咪走去同old seafood面前認下低威，走番去傳統政黨排隊囉。
又或者，不如心灰意冷，唔去選舉，離開政壇，做第二樣嘢囉，老實講，遠離政治，海闊天空，你估響傳統政黨搞政治，一樣有好多競爭同埋鬥爭，一樣有政治卡位，唔係咁易㗎！再或者，係重新搞一些小組織、地區團體，由低做起，好似八十年代民主派咁樣發展。但係，自從鎂光燈政治崛起，個個從政者都想走fast track，邊個想由低做起呢？
