用心建造太古城

每逢小學暑假，爭崩頭嘅假期活動，一定係參觀太古汽水廠。除咗有汽水飲之餘，仲會有一份文具禮物包，等到新嘅學年，自然show off一番。又十幾年後出嚟社會做事，儲夠錢去歐洲旅行，終於可以搭到國泰航空，於機艙偷望布簾後嘅商務客位，同一時空的兩種待遇。又再十幾年之後，儲夠首期終可買樓，太古城一定係奮鬥動力。原來人生中有幾件回味大事，不自覺地都因為太古集團。

自給自足，Company Town
如要認識SWIRE，太古城正好係代表。佢係香港樓市嘅指標，亦因此將香港島由昔日只係集中於發展上環至北角之間，帶動鰂魚涌打落到筲箕灣一帶發展為工業廠房，再建立東區成為居住理想地點。做得樓市探熱針，當然有佢嘅原因，太古城11期共61座，分別由1979年初期近西灣河的三座樓至最後1987年屋苑正中嘅海天花園，而675、843，更係單位呎數嘅首選。

太古城原址為糖廠、船塢、汽水廠等工業設施。早於1881年，太古投得鰂魚涌海灣近地作為糖廠選址，大舉興建碼頭、鐵路、倉庫、煤庫，甚至食水設施。3年後全球規模最大同最先進嘅「太古車糖」落成，不久已穩佔供應中國食糖2/3市場。隨著需求及員工日增，宿舍及大班屋相應落成(雖然早期宿舍已出售重建，但街道仍以太字為首。)，加上1923年成立之太古義學，形成自給自足嘅Company Town。

戰後再建，轉戰物業
及至1900年，太古移山填海以建造船塢，七年後太古船塢落成並為遠東最大的船塢之一，紀念石碑仍保留至今。無奈二次大戰使煉糖廠同船塢徹底摧毀，及後1950年兩者再度全面投產，並且新一批獨立廚廁嘅宿舍、診所、遊樂設施，以及太古福利會及太古漢文學校亦隨即落成。

七十年代太古與黃埔合併為聯合船塢後，太古地產嘅成立並帶來太古城計劃。秉承着昔日集團對社區建設嘅經驗，屋苑劃時代設有平台園藝花園，住宅電梯可到達花園或直達地下。而平台設有康樂設施及商舖位置，更擺放雕塑家文樓(文寶樓)博物館級作品。平台下層為停車場及其餘商舖，銀行、超級市場、食肆、診所、郵政局甚至教會都輕易找到，甚至大型至「好運街市」、巴士總站同太古城碼頭都有。而太古還設立免費的英語學習班，連同維修基金在內嘅特平管理費，兩者亦係居民間嘅秘密。

貼心設計，作品代表
除咗太古城之外，太古城中心亦同樣吸引。室內真雪溜冰場、保齡球場、過山車，尤其早年嘅出奇老鼠、花生屋、玩具反斗城，都係放假消閑嘅優質熱門地點。及後東區走廊之興建亦有出入口直達，方便當中嘅商業大樓。其更為首個以集團為名的地鐵站站名(美孚站原為荔灣站，於1985年5月31日港島綫通車時才更名。)，均可見為何《新紮師兄》中嘅太「白」城會咁高尚吸引。太古城盡顯集團的實而不華，仲有其英文名字Tai Koo Shing，更尊重廣東話拼音，顯出香港味道。