荷蘭叻現象

今屆世界盃，罕有地沒TVB份，沒荷蘭份，想當然，也沒太多TVB之友兼荷蘭鐵粉陳百祥的事了。我本人無所謂，觀乎他近日因粉嶺高爾夫球場的發言遭受口誅筆伐，不講波，觀眾大概額手稱慶吧。

不過又看到，網上有fans留言話很懷念叻哥喎。都無所謂，自由社會各有所好。我問朋友喜歡陳先生甚麼，朋友笑說：「你懂的。」懂甚麼？答曰：「認真你就輸。」

我相信，即使我重操記者故業，認真地問陳百祥有否反思公眾形象，他同樣會咁答「你懂的」、「認真你就輸」之類，再不然便「要反思只因我太受歡迎」……即係點？不知何時開始，充斥這類模稜兩可的說話方式，神劇究竟好唔好睇？明燈究竟可唔可靠？畢業送幅「學海明燈」，老師應該怎反應？我就是不懂！我知，你會笑我老土，但滿口人云亦云、陳腔濫調的潮語，才更老土更唔型。哲學大哉問難分界，簡單喜惡總可講清楚吧，為何盡變得神神秘秘的？抑或唯靠滑頭，方可亂世求存？而且立於不敗之地——例如隨口噏某港姐屬極品，你甚至毋須見過，她無論美醜賢愚，你都言出必中，又不怕得罪人。我說的荷蘭叻現象，原是全城現象。

長此下去，怎教下一代是非觀念？我要求自己，今後聽說讀寫文只依字面意思，荷蘭叻便是支持荷蘭隊的阿叻而已，難道還有別的意思？