新舊車廂，一站共融，體現香港精神。
集體運輸可以話係城市嘅繁榮指標，車站建設直頭代表對未來嘅預視。從一開始，不論地上或地下之交通，呢度就係設計為中轉作用。城市脈搏，路線穿梭，通往未來，盡在金鐘。
返工放工，人頭湧湧，朝夕相對，甚為繁忙。金鐘嘅真正規劃，正要由地鐵講起。戰後香港，大量移民急速湧入，勞動力嘅急增，亦帶來市區嘅擠迫同交通問題。有見及此，大型集體運輸嘅概念有助人口擴散遷移，甚至可建立自行發展嘅塥=衛星城市，而呢個正係香港地鐵誕生嘅目標。
縱橫路線，按時拓展
回到1964年，「公共運輸調查小組」成立，並於3年後嘅《香港乘客運輸研究》中指出預計20年後香港人口將接近700萬，建議興建4條行走地底嘅鐵路路綫。分別為荃灣至金鐘、馬游塘(油塘)至上環街市、堅尼地城至柴灣、禾寮坑(火炭)至尖沙咀。及後再預期人口調整及新市鎮之城市規劃，所以改為觀塘綫、荃灣綫及港島綫作先行興建，並配合更新九廣鐵路，所以沙中綫可延後發展。
及至1968年，計劃再度修正以先興建彩虹至旺角、旺角至海軍船塢、海軍船塢至上環為三段主幹；再繼而旺角至荔枝角、彩虹至觀塘為輔助，並正式定為「早期系統」(Initial System)。至於早前所建議嘅其餘路段設計，則再延後。再到1975年施工前路線再度修改為觀塘至中環，訂名為「修正早期系統」，地下鐵路公司正式成立。而最初嘅海軍船塢亦更名為金鐘，至於海軍總部意思嘅Admiralty則不變，並於1980年2月12日啟用。
由U1至L6共8層的金鐘站，將會連同添馬站成為最大之「六綫交匯」轉車站組群。
六線集結，分道揚鑣
地鐵嘅通車帶來金鐘嘅變天，尤其太古地產繼太古城後視太古廣場為第二目標。今日嘅金鐘站集荃灣綫、港島綫同埋南港島綫嘅轉車任務，預計於2021年增加東鐵紅磡南延之沙中綫。而於2026年更相連添馬站之將軍澳綫及東涌線之兩線伸延，將會成為最大嘅「六綫交匯」轉車組群，在繁忙人流之下不斷挑戰建築技術愈掘愈深。
講到轉車，金鐘站嘅超弧形月台，以及頭長尾短嘅步距印象甚為深刻。醒字派港島東地膽識得先出金鐘上一層，到對面月台往中環回頭再去九龍，可見已經超越最初設計嘅負荷。而黃藍色嘅金鐘站亦係另一標記，香港嘅地鐵各站之間採用對比選色，中環作為尾站用上大紅，而海軍意思嘅Admiralty則配以藍。但又可能金字之故，部分地方又以鮮黃配搭。不過實在與尖沙咀有重疊色調，所以黃色部分近年已作藍調更換，有幸獨有嘅「地鐵宋體」同毛筆字則繼續更新和保留。
路上地下，不甘規限
深43米，共8層近半世紀擴展嘅金鐘地鐵站，與港人甚至世界遊客帶來小島嘅繁華。為生活經常地底路過，為未來也曾經地上聚集。由昔日嘅海軍，到靜待嘅市民，這裡沒有屋苑，但曾經有英軍駐守，自此金鐘通往未來，不再只有純商業發展，還有求真求變嘅初衷良心。
