由五支旗桿到海運大廈

現時五支旗桿所懸掛的旗幟，由高至矮分別為中華人民共和國、香港特別行政區、九龍倉、海港城及天星小輪。

「喺五支旗桿度等」，舊時只有固網電話嘅年代，無論係想邀約心儀佳人，抑或朋友敘舊，聽筒中總離不開呢句。縱然時代變遷海岸改變，但旗桿代表嘅尖沙咀海運大廈至今，仍是維港九龍代表。

過去五支高低旗桿分別代表英國丶香港丶九龍倉丶海港城及天星小輪，正因昔日只有天星小輪連接兩岸，加上九廣鐵路終點站於此，亦正因為五支旗桿旁嘅海運大廈係當時香港第一個大型商場，叫這九龍半島嘅盡頭，因利乘便成為港人消閒以及相約勝地。

一句說話．一代習慣
一句說話成為港人集體回憶，正反映這旗桿位置，成為香港多代人心中嘅重要地標。相約在旗桿，自然會走進海運大廈商場，當年一大特色正係全港(可能係東南亞)最大而建築在三樓嘅露天停車場，仲有三塊大型廣告燈牌，燈牌廣告晚上不單照亮維港，情侶們在亮麗霓虹燈管映照下，喁喁細語中放閃。或微雨雙雙傘影，浪漫地對照彼岸港島夜色，此情此景，又係多少Karaoke嘅MV場面。
今日露天停車場上廣告不再，九龍倉集團於海運大廈盡頭進行擴建，由著名設計師Foster & Partners操刀，因可坐享一流港景，新大樓進駐不少高級餐飲食肆。每日不少遊客慕名「打卡」，到上層停車場欣賞對岸港島風景，不論黃昏傍晚或入夜華燈，明媚風光已經相當滿足，一家大細整日享受，簡單生活就是美好。

一川如畫．一望無垠
1966年開幕嘅海運大廈，因九龍倉於1963年獲政府資助重建1號碼頭，斥資七千多萬建成四層高大樓，成為全亞洲首個大型購物商場，並由港督戴麟趾及請來嘉賓瑪嘉烈公主主持開幕儀式。
除中西電影曾在此取景，或每年聖誕新年舉辦大型主題燈飾節目外，海運大廈50多年來，亦有不少津津樂道大事。如1967年9月無綫電視於正式啟播前，就派出藝員在海運大廈舉辦大型演出節目，連續一個月直播派禮物作為試播，吸引不少市民觀眾。另英國伊麗莎白女皇二世與愛丁堡公爵，亦於1975年曾經到訪、1986年海運大廈舉辦嘅港京拉力賽起點、同年玩具反斗城進駐、加上1994年有史泰龍剪綵嘅Planet Hollywood開幕、再到2016年由荷蘭藝術家Florentijn Hofman 創作，風靡全球的16.5公尺高充氣小黃鴨，話題風頭一時無兩，至今印象深刻。

一個海港．一匡天下
八十年代港人移民海外，想打IDD都會嚟到海運大廈嘅大東電報服務中心，大排長龍才能使用三數分鐘服務。由歐美日遊客到自由行拖篋客，從古董及手工藝傢具、上海師傅度身西裝、服飾刺繡或珠寶首飾，甚至打書釘嘅晨衝書店，到名錶手袋化妝品等國際品牌，都見商舖變遷，也反映香港不斷變化。原來尖沙咀整個九龍倉發展群中，馬哥孛羅香港酒店嘅H型和海洋中心嘅K字建築設計，低調地記示了集團發展，叫五支旗桿上所飄揚之旗幟屹立不倒，叫作為海港城一員嘅海運大廈自豪於「一個海港，只有一個海港城」。