響港珠澳大橋開檔之時，北方大老細一強出席開幕。原本呢，就應該響早上九時開始，大家排晒隊等九點。大家要知道，響任何一個領導人出席的會議或項目，領導人一定會準時。呢樣嘢係同佢地的工作日程好有關係：任何拖延都會出事，亦係對場合的尊重。有啲場合，可能有更VIP的VIP響度，冇理由就咁畀VIP中之VIP苦候領導人。響全球來講，只有一個人，佢係鍾意遲到，仲要遲到激死嘉賓，國家元首來訪都一樣遲到，嗰個人叫普京。
講遠咗。所以，大老細來開幕，居然遲了二十分鐘開始。大家之注意力，當然係大老細同好打得一齊行出來，以示加持。呢個場面，粉碎咗有人對付好打得之「陽謀」，咁係有利好打得排除干擾做嘢。咁好多口痕友問，究竟大老細響嗰二十分鐘裡面，做咗乜嘢呢？
等咗幾日，終於有啲眉目。早幾日，親中報章就有頭條講，西環一哥響西環開了一個擴大會議(總之係勝利的大會、團結的大會)，香江之北方代表坐喺邊度。呢啲全宇宙都出席的會議，唔係要聽西環一哥的說話，而係要聽由西環一哥轉達過來的訊息。咁謎底有些少解開的跡象：嗰二十分鐘，北方大老細響珠海畀咗訓話。
咁個訓話內容係乜，大家有時間自己上網搵啦，呢啲上面黨的說話，唔通搞「懶人包」咩？只不過，成個講話好緊要，就係要求北方響香港的機構，一定要幫手，總之要幫手，幫香江，要做香江同北方交流之橋樑者、協調者、促成者。咁即係點呢？係唔係過去一段時候，做唔到一個好之橋樑者之角色，發揮唔到協調唔同利益的角色，同埋促成唔到兩地更緊密交流之角色呢？
仲有，就係要北方在港之機構，要支持香江，提升香江，推動高質量發展同形成全面開放格局中的地位及功能。咁又要思考一下，香江有乜嘢角色可以做呢？睇到內文，再一次提到一樣嘢：「一個國家，兩種制度，三個關稅區」，咁仲有好多人響呢個口號上仲加多幾樣嘢例如三種貨幣。但係official line係呢個一、二、三。點樣去做好，點樣利用三個關稅區之優勢，響美中貿易對抗之時，使用呢個優勢，先至緊要。
我呢啲廢中，又唔識北方發展，當然唔知點樣去準確掌握呢句嘢的含意。但就睇到，北方係好想香江響三個關稅區方面有所作為。因為三個關稅區之說法，係因為香江同澳門，都係世貿成員，係用「獨立關稅區」的名義加入。咁獨立關稅區之名義，就可以響國際貿易方面有差別待遇，亦可以因為咁樣更有力地響國際貿易之中，利用此名義去靈活運作，響美帝圍堵之中，做一啲事，唔好畀炮火所傷。咁香江有乜新任務？睇下好打得表演矣。