Capcom可以話罕有一間唔受遊戲市場改變而有大影響嘅開發商，當唔少同期如當年格鬥遊戲最大敵人SNK都要賣IP求出路嘅同時，Capcom唔只有一堆堆值錢IP，就算每年都積極開發新遊戲都依然叫好叫座，上年「芒亨World」已經係最大例子。當中《Devil May Cry》呢個牌頭，可以話幾經波折，終於最新作《Devil May Cry V》已經正式推出。上集《DmC：Devil May Cry》意欲重啟由頭嚟過，結果風格改到太美式反而趕走埋本身fans，今集痛定思痛，直接無視重啟版本，主角用返大家熟悉嘅白髮、紅袍同手持魔劍嘅但丁，並加上第4集主角Nero同舊角色Vergil，回憶絕對返晒嚟！唔計劇情，本身遊戲水準亦極高，特別係但丁以劍同槍組合嘅連技，一個字就係「爽」，唔同角色都充滿魅力，絕對值得老玩家支持、新玩家入坑！